Shillong, Oct 19: Meghalaya a·dokni pilak biaprangon Durga Puja-ko maniengani gimin Meghalaya Police, a·dokni dingtang dingtang biaprango, mongsongbate Shillong songjinmao nirok sandianirangko mangrakbatataha.
Traffic-ni Superintendent of Police (SP) Hari Prasanta-ni kobor ra·timgiparangna u·iatani gitade, Chief Secretary R Telang-ni dilanichi aro a·dokni Director General of Police (DGP) Idashisha Nongrang-ni dongpaanichi, Central Puja Committee baksa tom·aniko ong·atangenba, police-ni chel·chakaniko mangrakbatatna tik ka·angaha.
Walni somoirango aro pringwalchipak simsak nirokanirangko dakna nangbatenga ine CPC-ni u·iataniko man·ani ja·man, mongsonggipa biaprango sipai dolrangko dondapataha ineba Prasanta aganaha.
Traffic SP-ni aganani gitade police, walni 12:00 bajimangoni pring 5:30 ba 6:00 bajirangona kingkingan, kenchakna nanggipa biaprango sipai dolrangko donate, nirok sandianirangko dakatenga.
Adita salrangna skang, Mawbah jolo, petrol bomako godape, scooty bolsako wa·al kamatani ja·man, Puja manienggiparang, kenchakna nanganirang ong·engani gimin police, dingtang dingtang biaprango chel·chakanirangko bilakbatataha.
Scooty-ko wa·al kamatgipani bidingo janapatengon, da·o dipet ia a·selni bidingo police, darangkoba rim·na man·kuja indiba dos dakgipa manderangko sandienga ine SP parakataha.
The post Durga Puja-na police-ni chel·chakaniko mangrakbatata appeared first on Hub News.