Tungod sa gilauman nga huwaw dala sa El Niño, opisyal nga gipahibalo sa Kagamhanan sa Lungsod sa Minglanilla nga dili una ipadayon ang ilang Christmas Party karong tuiga.
Pinaagi niini, giingong mas ma-prioritize sa kagamhanan ang pundo aron magamit sa El Niño preparedness ug response efforts aron maserbisyuhan ug mapanalipdan ang mga mga residente batok sa hulga sa kakuwang sa tubig ug grabeng kainit.
Bisan pa man niini, gipasalig sa lungsod nga padayon gihapon ang tradisyonal nga Christmas lighting activities sama sa giplano niini ug ilabi na alang sa kabataan.
Kini nga lakang gihimo alang sa mas lapad nga pagpangandam sa tibuok Probinsiya sa Sugbo batok sa hulga sa El Niño.
Ang Kagamhanan sa Probinsiya sa Sugbo una nang naghatag og mga pamaagi batok El Niño sama sa pagseguro sa igong suplay sa tubig, agrikultura, panglawas, ug panginabuhian sa tibuok lalawigan.
Samtang ang Lungsod sa Minglanilla miumol sab og Minglanilla El Niño Taskforce (Ment) pinaagi sa Executive Order No. 17, Series of 2026, alang sa mas paspas nga pagpatuman sa mga dinalian nga interbensyon ug maseguro sab nga matabangan ang matag panimalay.
Sumala sa World Meteorological Organization (WMO), ang El Niño gilauman nga mosamot pa paingon sa katapusan sa 2026 ug mabati ang grabeng epekto niini sa Nobiyembre ngadto na sa Pebrero.
Tungod niini, ang Department of the Interior and Local Government (DILG) hugot nga nag-awhag sa mga lokal nga kagamhanan nga dili na magpaabot nga mamilegro ang suplay sa tubig una molihok. / ANV