ABŞ Prezidenti Donald Tramp administrasiyasının Ukrayna hərbçilərinin “Starshield” peyk rabitəsi xidmətlərindən istifadəsinə məhdudiyyət qoyulmasında iştirakını təkzib edib.
APA xəbər verir ki, Tramp bu barədə Ağ Evdə jurnalistlərlə söhbəti zamanı danışıb.
“Bilmirəm, bunu kimsə edib, ya yox. Bunu mən etməmişəm və düşünmürəm ki, bu, İlon Mask olub”, – Tramp deyib.
Trampın sözlərinə görə, onun başa düşdüyü qədərilə, sistem əvvəlki qaydada işləyir.
Qeyd edək ki, oktyabrın 15-də “Reuters” mənbələrə istinadən Ukraynanın “Starshield” peyk rabitəsinə çıxışının məhdudlaşdırılması barədə göstərişin Ağ Evdən verildiyi barədə məlumat yayıb.