ޓެސްލާގެ ފުރަތަމަ "އުދުހޭ ކާރު" ދައްކާލުމަށްފަހު، ދުނިޔޭގެ އެންމެ މުއްސަނދި އިންސާނާ އިލޮން މަސްކުގެ މިލްކިއްޔާތުން އެއް ދުވަހާ 20 ބިލިއަން އެމެރިކާ ޑޮލަރު ގެއްލި، މުޅި ދުނިޔެއިން ވެސް އެންމެ ބޮޑު މާލީ ގެއްލުމެއް ތަހައްމަލުކުރި މީހާއަށް އޭނާ ވެއްޖެއެވެ.
ފޯބްސް މެގަޒިންގެ ރިއަލް-ޓައިމް މައުލޫމާތުތަކަށް ބަލާއިރު، މަސްކުގެ މިލްކިއްޔާތު ކުރީ ދުވަހާ އަޅާބަލާއިރު 2.11 އިންސައްތަ ދަށްވެ، މިހާރު އޭނާގެ މުޅި މިލްކިއްޔާތުގެ އަގަކީ 925 ބިލިއަން އެމެރިކާ ޑޮލަރެވެ.
ބުރާސްފަތި ދުވަހު ޓެސްލާ ކުންފުނީގެ ހިއްސާގެ އަގު 1.3 އިންސައްތަ ދަށްވެފައިވާއިރު، ފާއިތުވި ފަސް ދުވަހުގެ ތެރޭގައި އެ ކުންފުނީގެ ހިއްސާގެ އަގު ވަނީ 4.9 އިންސައްތަ ދަށްވެފައެވެ. އަދި މިއަހަރުގެ މިހާތަނަށް ޓެސްލާގެ ހިއްސާގެ އަގު ވަނީ ޖުމްލަ 17 އިންސައްތަ ދަށްވެފައެވެ. މީގެއިތުރުން މަސްކުގެ ޖައްވީ ކުންފުނި ސްޕޭސްއެކްސްގެ ހިއްސާގެ އަގުވެސް 2.3 އިންސައްތަ ދަށްވެ، މިއަހަރުގެ މިހާތަނަށް އެ ކުންފުނީގެ ހިއްސާގެ އަގުން ވަނީ ގާތްގަނޑަކަށް 8 އިންސައްތަ ދަށްވެފައެވެ.
ޓެސްލާގެ ރޯޑްސްޓާ --- ފޮޓޯ: ޓެސްލާ
ހިއްސާގެ އަގުތައް ދަށްވާން ފަށާފައިވަނީ މަސްކު އުދުހޭ ކާރެއްގެ ގޮތުގައި ސިފަކުރި "ޓެސްލާ ރޯޑްސްޓާ" ދައްކާލުމުގެ ކުޑަވަގުތުކޮޅެއް ކުރިންނެވެ. ޑްރައިވަރަކާ ނުލައި ދުއްވޭ ދެ ގޮނޑީގެ މި ކާރު ވަނީ އުސް ރޭމްޕަކަށް އަރައި، ވައިގެ ތެރޭގައި އެކޮޅުކޮޅުންޖެހި، ބުރުއަޅައި، އެއާ ޖެޓްތަކުގެ އެހީގައި ބިމުގައި ޖައްސާ މަންޒަރު ދައްކާލާފައެވެ.
ސިކުންތަކަށްވުރެ ކުރު މުއްދަތެއްގެ ތެރޭގައި ސުމަކުން ގަޑިއަކު 60 މޭލު (96 ކިލޯމީޓަރު) ގެ ބާރުމިނަށް ދުއްވާލެވޭ މި ކާރު މާކެޓަށް ނެރެ އާންމުކޮށް އުފެއްދުމަށް ހަމަޖެހިފައިވަނީ 2028 ވަނަ އަހަރުއެވެ.
ސީއެންއެންއިން ރިޕޯޓްކޮށްފައިވާ ގޮތުގައި، މި ކާރުގައި ވައިގެ ތެރޭގައި ދަތުރުކުރުމަށާއި ބިމުމަތީގައި ހަލުވިކަމާއެކު ސްޕީޑް ނެގުމަށްޓަކައި 10 ނޮޒަލްއާއި "އަލްޓްރާ ހައި-ޕްރެޝަރު" އެއާ ޓޭންކްތަކެއް ބޭނުންކުރެއެވެ.
މަސްކު ސިފަކުރި ގޮތުގައި މި ޓެކްނޮލޮޖީއަކީ ދުނިޔޭގެ އެންމެ މޮޅު ކާރު އުފައްދާ ކުންފުންޏާއި ދުނިޔޭގެ އެންމެ މޮޅު ރޮކެޓް އުފެއްދުމުގެ ދާއިރާގެ ކުންފުނި ގުޅިގެން ކުރި މަސައްކަތުގެ ނަތީޖާއެވެ.
ރޮއިޓާސްއިން ބުނެފައިވާ ގޮތުގައި، ރޯޑްސްޓާ ނެރުމަށް ކަނޑައެޅި ސުންގަޑިތައް އެތައް އަހަރެއް ވަންދެން ފަހަތަށް ޖެހުމަށްފަހު މި ކާރު ދައްކާލުމުން ޓެސްލާއަށް ބޮޑު ކުރިއެރުމެއް ލިބުނު ނަމަވެސް، މިއީ އެ ކުންފުނިން އަމިއްލައަށް ދުއްވާ ޓެކްނޮލޮޖީއާއި ރޮބޯޓިކްސްއަށް ސަމާލުކަން ބަދަލުކުރަމުންދާ ދަނޑިވަޅެކެވެ. އަދި އިންވެސްޓަރުންނަށް މިއަށްވުރެ މުހިންމު ކަމަށްވާ ތިންވަނަ ކުއާޓަރުގެ މާލީ ނަތީޖާ ހާމަކުރުމަށް މަދު ދުވަސްކޮޅަކަށް ވެފައިވަނިކޮށެވެ.
ރޯޑްސްޓާ އުދުހޭ މަންޒަރު ދައްކާލަނީ --- ފޮޓޯ: ޓެސްލާ
ޓެސްލާގެ އިންވެސްޓަރެއް ކަމަށްވާ ޑީޕްވޯޓާ އެސެޓް މެނޭޖްމަންޓުގެ މެނޭޖިން ޕާޓްނަރު ޖީން މުންސްޓާ ސޯޝަލް މީޑިއާ ޕްލެޓްފޯމް އެކްސްގައި ވިދާޅުވީ، މިއީ އާންމުކޮށް ކާރު އުފައްދާ ކުންފުނިތައް ލަދުގަންނުވާލުން ފިޔަވައި ވިޔަފާރީގެ ގޮތުން އެއްވެސް މަންފާއެއް ނެތް އިންޖިނިއަރިން ކުޅަދާނަކަމެއް ދައްކާލުން އެކަނި ކަމަށެވެ.
މޯނިން ސްޓާގެ އެނަލިސްޓް ސެތު ގޯލްޑްސްޓީން މިދިޔަ މަހު ނެރުއްވި ނޯޓެއްގައި ވިދާޅުވެފައިވަނީ، ޓެސްލާގައި މިވަގުތު އިންޖިނިއަރިންއާއި ޓެކްނޮލޮޖީގެ އެންމެ މަތީ ފެންވަރު ދައްކުވައިދޭ "ހެލޯ ކާރު" ނުވަތަ ހައި-ޕާފޯމަންސް ލަގްޒަރީ އުޅަނދެއް ނެތް ކަމަށާއި، ނަމަވެސް އަލަށް ނެރޭ ރޯޑްސްޓާ ވެގެންދާނީ ޓެސްލާގެ އާ ހެލޯ ކާރަށް ކަމަށެވެ.
2008 ވަނަ އަހަރު ނެރެ 2012 އާއި ހަމައަށް ވިއްކި އަސްލު ރޯޑްސްޓާއަކީ ލޯޓަސް އެލީސް ޗެސިސްއެއް ބޭނުންކޮށްގެން ޓެސްލާއިން އެންމެ ފުރަތަމަ އުފެއްދި އިލެކްޓްރިކް އުޅަނދެވެ. އެ އުޅަނދަކީ އިލެކްޓްރިކް އުޅަނދުފަހަރާމެދު ދުނިޔެ ދެކޭގޮތް ބަދަލުކޮށްދިން ކާރެކެވެ.
އޭގެ ފަހުން ޓެސްލާ މަޝްހޫރުވެފައިވަނީ އެ ކުންފުނީގެ މޮޑެލް ވައި އަދި މޮޑެލް އެކްސް އެސްޔޫވީތަކާއި، މޮޑެލް އެސް އަދި މޮޑެލް 3 ސެޑާން ކާރުތަކުންނެވެ.