Nahuli-cam ang ginawang pagtangay ng apat na kabataan sa isang piso wifi machine na naglalaman ng aabot sa P4,000 na barya sa Numancia, Aklan.
Batay sa impormasyon ng GMA Regional TV, na iniulat sa GTV News Balitanghali nitong Martes, mapanonood sa CCTV camera na saglit na huminto ang pagnanakaw ng mga lalaki sa Barangay Aliputos dahil sa tahol ng mga aso.
Makaraan ang ilang saglit, tumiyempo ulit ang mga lalaki at nagpatuloy sa target nilang makina.
Natanggal ng dalawa ang makina saka ito pinukpok para kunin sana ang mga barya.
Ngunit nagmadali ang mga kabataan at tinangay na lang nila ang buong makina.
Makaraan ang ilang oras, natuklasang inabandona na ito ng mga kawatan at kinuha ang abot sa P4,000 na barya.
Kinabukasan sa Barangay Poblacion, isa na namang piso wifi machine ang pinuntirya nila.
Nawasak man ang makina, natigil ang pagnanakaw dahil sa pagdaan ng mga tao.
Nadakip sa bayan ng Kalibo ang apat na kawatan, at natuklasang nakaw din ang sinasakyan nilang motorsiklo.
Posibleng maharap sa kaukulang reklamo ang mga kabataan na edad 14 hanggang 16, depende sa magiging resulta ng assessment ng social worker. – Jamil Santos/FRJ GMA News