Ուկրաինայի նախագահ Վլադիմիր Զելենսկին չի ցուցաբերում անհրաժեշտ քաղաքական կամք Ռուսաստանի հետ հակամարտությունը կարգավորելու համար, հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով ԱՄՆ նախագահի հայտարարությունը, որ Ուկրաինային նոր նախագահ է անհրաժեշտ։
Պեսկովն ասել է, որ Ուկրաինայի նախագահը պետք է կայացնի «շատ պատասխանատու և շատ դժվար որոշումներ՝ այս պատերազմը դադարեցնելու համար»։
«Թրամփն ասաց, թե կարծում է, որ ժամանակն է նոր նախագահ ընտրելու։ Ինչո՞ւ։ Որովհետև Ուկրաինայի նախագահը պետք է շատ պատասխանատու և շատ դժվար որոշումներ կայացնի այս պատերազմը դադարեցնելու համար։ Կա՛մ Զելենսկին ստանձնում է այս պատասխանատվությունը և ցուցաբերում քաղաքական կամք, կա՛մ՝ ոչ։ Մինչև այժմ նա դա չի անում», - «ՌԻԱ Նովոստիին» ասել է Կրեմլի խոսնակը։
Դոնալդ Թրամփը շաբաթ հայտարարել էր, որ Ուկրաինայում նոր նախագահ ունենալու ժամանակն է: «Ես առաջարկում եմ նրանց նոր առաջնորդ ընտրել, ով կարող է գործարք կնքել»,- Սպիտակ տանը ելույթ ունենալիս ասել էր Թրամփը՝ հավելելով, որ ինչ-ինչ պատճառներով Զելենսկին «երբեք դա չի անում»։ Նա նաև նշել էր, որ եթե ինքը լիներ ԱՄՆ նախագահ 2022-ին, «այդ պատերազմը երբեք չէր սկսվի»։
Թրամփն ասել էր, որ Վլադիմիր Զելենսկին «կորցրել է երկրի 30 տոկոսը, և ավելի քան մեկ միլիոն մարդ է տուժել, իսկ զոհերի թիվը գերազանցում է 2 միլիոնը»։ «Սա մի պատերազմ է, որը երբեք չպետք է սկսվեր։ Եվ ես կարծում եմ, որ Ուկրաինայում նոր նախագահ ունենալու ժամանակն է», - ասել էր ԱՄՆ նախագահը։
Զելենսկին էլ, արձագանքելով Թրամփին, հայտարարել էր, որ եթե Ռուսաստանը համաձայնի 60-օրյա հրադադարի, ապա Ուկրաինայում նախագահական ընտրություններ կկազմակերպվեն: «Խնդրում եմ, փոխանցեք Պուտինին. տվեք մեզ երկու ամիս՝ 60 օր լիակատար հրադադար, և մենք կկազմակերպենք ընտրություններ», - ասել է Զելենսկին ABC հեռուստաալիքի «This Week» հաղորդման եթերում։