Oktubre 14, 2026 7:06pm GMT+08:00
SINULAT NI: GMA News
Sa kulungan ang bagsak ng isang lalaki matapos niyang pagnakawan ang isang bahay at tumangay ng mga gamit—kabilang ang ilang mamahaling relo smart TV welding machine at ilang sapatos— sa Barangay Tinajeros, Malabon.
Sa ulat ni Gabriel Gonzales sa GTV Balitanghali nitong Miyerkoles, makikita na nagkalat ang gamit sa bahay nang datnan ng mga awtoridad nitong Huwebes ng madaling araw, Oktubre 8.
Ayon sa 42-anyos na may-ari ng bahay, wala siyang kamalay-malay na nilooban na ang kaniyang bahay.
Mga suspek sa pagnanakaw ang mismong kapitbahay ng biktima na isang electrician at isa pang lalaki.
“Magta-transfer ako ng unit dito sa Paranaque. Kaya lang, pag-uwi ko ng Thursday, sinabihan lang ako ng tita ko nga na bukas daw 'yung pinto namin kasi every weekend lang din ako umuwi to check 'yung bahay. Immediately, dumiretso ako ng uwi after work. Tapos 'yun na nga, so talagang nanlumo ako na walang natira sa mga gamit ko,” sabi ng biktima.
Kasama sa mga natangay ang siyam na relo, TV, sapatos at isang welding machine na may kabuuang halaga na halos P200,000.
Nahuli ang isa sa mga suspek sa bahay nito sa follow-up operation ng barangay at pulisya, at nabawi ang ilan sa mga gamit na ninakaw.
“Ang masabi ko po, hindi ko pa talaga ginawa ‘yun. Nadamay lang po. Sa bahay ko lang po nakuha 'yung mga materyales din po, ‘yung mga ninakaw nila. Ninakaw niya para ibebenta ko siguro,” sabi ng isa sa mga suspek.
Dagdag ng barangay, ang nakatakas na suspek ang may dala sa karamihan ng mga gamit ng biktima.
“Katulad nga ng sinasabi sa inyo, 42 inches na TV, welding machine, siyam na relos na vintage na branded, saka mga sneaker. Dala ng kasama niya 'yun daw ang nagbenta,” sabi ni Angel Tankeko, Executive Officer ng Barangay Tinajeros.
Nasa piitan na sa Malabon City Police Station ang nadakip na suspek na mahaharap sa reklamong robbery.
Natukoy na rin ng pulisya ang kaniyang kasabwat at nasampahan na rin ang reklamo. – Jamil Santos/FRJ GMA News