Ouministeli wouhaku nonghalo nawa owa holola kutya otau ka tula moilonga omilandu doudu wopamadiladilo hamano moshilongo okunghonopeka ouhaku wopamadiladilo.
Edi oda hololwa kuMinista wouhaku nonghalo nawa Dr Esperance Luvindao.
Minista okwa holola kutya omilandu edi otadi ka tulwa moilonga oule weedula 10 twa taalela. Omilandu edi oda tulwa moilonga sha landula eshi ouministeli wa holola omulandu mupe wounghundi wopamadilongo oo tau ifanwa Mental Health Bill.
Dr Luvindao adishe edi okwe di holola pefimbo losheendo shoundjolowele wopamandilandilo, sha ningwa moshilandopangelo.
Okwa ti okukatuka onghatu shina sha nouhaku okwa fimana neenghono.
Minista okwa holola kutya enghonopeko loudu wopamadiladilo natango ola pumbwa okutulwa moilonga, elongelo kumwe, neshiivo la wana opo oshiwana shi dule okukala sha mona omayakulo a wana po osho yo okukwafa ovo ve li momhumbwe.
Luvindao okwa ti fiyo okeluwa e li, oshilongo oshi li momhumbwe yoipangelo, ovapangi novanawino voinghundi womadiladilo osho hashi eta ovanhu ve na ounghundi wopamadiladilo va kale inava mona ekwafo lopaunamiti la wana po ngaashi ve na okukala va shiilwa oshisho.
“ Okupitifa omilandu edi itashi ti sha omanga pe na ovanhu va pumbwa ekwafo lopauhaku ashike ite li mono molwaashi pehe na oipangelo ya wana,” Minista ta holola ngaho.
Luvindao okwa holola yo kutya moNamibia omu na ashike omandiki avali okupanga nokuyandja ekwafo kovanaudu ve na ounghundi wopamadiladilo.
Minista okwa ti moshilongo kamu na eenhele dokukala ovanaudu da wana hano eepsychiatrists. Okwa ti moshilongo ashishe omu na ashike eepsychiatrists da fika punhee odo hadi kwafa ovanhu aveshe ovo va pumbwa ekwafo oshilongo ashishe.
Luvindao okwa holola vali kutya ovanhu ovo ve na ounghundi oo hau lundulula omaliudo omunhu efimbo keshe hano obipolar ohava veli hange moudjuu molwaashi ka pe na ovanawino va wana okupanga nokuyandja ekwafo kuvo.
Minista okwa fatulula kutya omilandu hamano odo tulwa moilonga, sha landula eenghundafana novanambewa vouhaku va yooloka omo mwa kwatelwa ovakulunhuwiliki, ovakulunhu, omupedu minista, ovanashipundi nakwao vamwe.
Luvindao okwa holola kutya okwa li ashike a pula omilandu nee ashike eshi va ka kala omutumba, ova tokola okuweda ko vali mbali odo aveshe va dimina di tulwe moilonga.
Nande va tula omilandu hamano moilonga, minista okwa dimina kutya ouministeli otau ka kandula po keshe oupyakadi wounghundi wopamadilongo. Ashike nande ongaho, oku na omukumo kutya otadi ka kwafela ouministeli okukandula po omikundu dakula odo tadi ka kwafa opo vahapu va mone ekwafo.
Minista okwa ti omilandu edi otadi ka kwafa ovanhu vahapu ovo tava lumbu nounghundi wopamadiladilo.
–hambelelenindaniel56@gamil.com
The post Ouhaku wopamadiladilo tau ka nghonopalekwa moipangelo appeared first on New Era.