ДУШАНБЕ, 15.10.2026 /АМИТ «Ховар»/. Масъалаҳои ҷалби сармоя аз бозорҳои байналмилалӣ, барориши коғазҳои қиматноки давлатӣ ва истифодаи механизмҳои нави маблағгузорӣ барои татбиқи лоиҳаҳои афзалиятноки Тоҷикистон имрӯз дар шаҳри Бангкок дар мулоқоти Вазири молияи Ҷумҳурии Тоҷикистон Файзиддин Қаҳҳорзода бо намояндагони ширкати байналмилалии молиявии «Rothschild & Co» баррасӣ шуданд. Дар ин хусус АМИТ «Ховар» бо истинод ба Вазорати молияи ҷумҳурӣ хабар медиҳад.
Дар мулоқот таваҷҷуҳи махсус ба беҳтар гардидани рейтингҳои байналмилалии қарзии Тоҷикистон ва аҳамияти он барои таҳкими эътимоди сармоягузорон ва васеъ намудани имкониятҳои ҷалби маблағгузорӣ зоҳир гардид.
Ҷонибҳо ҳамчунин оид ба дурнамои ҳамкории минбаъда, аз ҷумла истифодаи хизматрасониҳои машваратии ширкат барои тақвияти робитаҳо бо сармоягузорони байналмилалӣ ва ҷалби сармоя ба иқтисоди ҷумҳурӣ табодули назар намуданд.
АКС: Вазорати молияи Ҷумҳурии Тоҷикистон
Октябрь 15, 2026 17:25
