NONGOZI – Bayahi bamunzi waNongozi mwasibaka sapabalelo yalifolofolo saBarelwa babulela kuli bapila mwasabo yalifolofolo zanaheñi zesabisa, mi litau ni litongwani lizwelapili kutaseza limunanu mi litou libeya bupilo bwasicaba mwakozi.
Bayahi babapila mwahalaa libaka zapabalelo yalifolofolo ili Mudumo kwamutulo ni Nkasa Rupara kwambowela, babulela kuli bakatazeha kubukeleza likomu zabona, lipuli ni limbongolo kwalibatana, mi babañwi basaba kuzwela fande busihu.
Bakupa mubuso kutusa babalatehezwi limunanu zabona kwalifolofolo nikuli bazibahaze mihato yasilelezo kubukeleza limunanu zabona kwalibatana. Induna wamunzi waLushika, Richwell Makwele naize sicaba siutwisisa kuli baikabela silalanda ni lifolofolo kono mubuso
uswanela kutusa kufukuza lisinyehelo zetiswa ki kupila bukaufi ni libaka zapabalelo yalifolofolo.
“Lwa utwisisa kuli lupila ni lifolofolo zecwale kalitongwani, litau ni litou.
Hakuna kolukona kuya kakuli lupila hamoho ni lifolofolo,” nabulezi. Makwele naize Likolo la Silalanda, Mishitu ni Bupoti liswanela kunahanisisa kutusa balimi bao limunanu zabona libulaiwa ki libata.
Na ekelize kuli sicaba habasikafumana tuso kwamubuso mwakukolisa milaka yabona kuisileleza kwalibatana. “Lutokwa lika zekona kubukeleza lipuli, likomu mane cwalo niluna batu,” nabulezi. Muyahi yomuñwi wamunzi waNongozi, Chris Makwele, naize sicaba sitalimana ni mayemo atata kakuli sipotolohilwe ki libaka zapabalelo yalifolofolo zepeli.
Chris naize bayahi hañatañata bafitisize lipilaelo kumuyemeli wasilalanda, kukupa mubuso kutusa kusileleza batu babapila mwalibaka mokufumaneha lifolofolo. Naize litifo zalisinyehelo zalimunanu zebulaiwa ki lifolofolo zalyeha, mi babañwi balibelelanga mane kuisa kwalilimo zepeli. “Mutu hasinyehelwa miyaho yahae kamba simunanu sahao hasiswaliwa ki sibatana, mubuso uswanela kueza sesiñwi kapilipili,” nabulezi.
The post Sabo iokama Nongozi litau, litongwani libulaya limunanu appeared first on New Era.