Ռուսաստանը գիշերը բալիստիկ հրթիռներով հարվածել է Կիևին, ինչի հետևանքով մեկ մարդ է սպանվել, ութը՝ վիրավորվել, հայտնել է Ուկրաինայի արտակարգ իրավիճակների պետական ծառայությունը (ԱԱՊԾ)։ Քաղաքապետ Վիտալի Կլիչկոն հայտնել է, որ զոհը 21-ամյա կին է։
Հարձակման են ենթարկվել մայրաքաղաքի առնվազն երեք թաղամասեր: Դեսնյանսկի շրջանում այրվել է անմարդաբնակ շենք, վնասվել են մեքենաներ և մետրոյի կայարան: Կլիչկոն հայտնել է, որ արկի բեկորներն ընկել են մետրոյի կայարանի մոտակայքում՝ վնասելով ենթակառուցվածքը:
Հարձակումից հետո Կիևի մետրոն սահմանափակել է Չեռնիգովսկա և Լիսովա կայարանների գործունեությունը: Սոլոմյանսկի շրջանում հրդեհ է բռնկվել բժշկական հաստատությունում, ինչի հետևանքով վնասվել են բազմահարկ շենքի ճակատային մասը և պատուհանները: Դնեպրովսկի շրջանում վնասվել է ուսումնական հաստատություն:
«Ազատություն» ռադիոկայանի թղթակից Ալեքս Ռաուֆօղլուն, հղում անելով ուկրաինական աղբյուրներին, X սոցիալական ցանցում հայտնել է, որ Կիևը կրկին հրթիռային հարվածի մասին որևէ նախազգուշացում չի ստացել: Ավելի ուշ ԱՄՆ պետքարտուղար Մարկո Ռուբիոն նրան ասել է, որ չի կարող հաստատել այն տեղեկությունները, որ Կիևը նախազգուշացում չի ստացել ռուսական հարվածից առաջ: «Ես ճշգրիտ չգիտեմ, թե ինչ է պատահել երեկ երեկոյան», - ասել է նա:
Ռուսական զորքերը կառավարվող ռումբերով հարվածել են նաև Դնեպրին, հայտնել է շրջանի ռազմական վարչության ղեկավար Ալեքսանդր Գանժան։ Նա ասել է, որ մեկ տուն ավերվել է, ևս առնվազն երեքը վնասվել են։ Մեկ կին վիրավորվել է։
Ռիվնեի շրջանային ոստիկանության պետ Ալեքսանդր Կովալը հայտնել է շրջանի վրա հարձակման մասին։ Նա ասել է, որ վնասվել են մի քանի քաղաքացիական ենթակառուցվածքային օբյեկտներ։ Նախնական հաղորդագրությունների համաձայն՝ վիրավորվել է երկու կին։ Շրջանի մի մասը մնացել է առանց էլեկտրաէներգիայի։ Կովալը նշել է, որ հետագա հարձակումները բարդացնում են էներգետիկ աշխատողների վերականգնողական աշխատանքները։
Ռուսաստանի պաշտպանության նախարարությունը հայտարարել է, որ Կիևում և Կիևի մարզում հարվածել են ռազմական արդյունաբերության ձեռնարկությունների, թևավոր հրթիռների և անօդաչու թռչող սարքեր պահեստների և տվյալների մշակման կենտրոնի։