OSHAKATI- Omukulunhu wopolifi moshitukulwa shaShana Commissioner Andreas Shilelo okwa kumaida oshiwana opo shi kale tashi pula ekwafo opo shi findikilwe kopolifi ngeenge tashi ka nana oimaliwa shi hapu molwaashi ovanhu paife ova ninga oihakanwa yokunyekwa oimaliwa keembudi.
“Opolifi o i lile po okukaleka po eameno loshiwana mwa kwatelwa omaliko,” ta ti.
Okwa ti itashi ulike efano liwa ngeenge ovanhu alushe tava lopotwa va kanifa oshimaliwa shihapu eshi va ponokelwa koolyamupombo.
Shilelo natango okwa ti oshiwana na shi kale shi na oushiinda muwa tashi kwatafana ngeenge tashi dipo pomaumbo avo.
“Natango okwa didilika omaumbo taatewa konima ngeenge mwene weumbo a dja mo. Ka leni ta mu longele kumwe okukondjifa oimbuluma,” ta ti.
Shilelo okwa li ta popi elikwatela koshikumhungu shomunyeka woshimaliwa shi fike poN$ 70 000, osho sha nyekwa omulumenhu mOshakati omwedi wa dja ko, molukanda Uupindi.
Okwa koleka ta ti fiyo onena ka pena omunhu a kwatwa po mekwatafano lomunyeka ou.
Opolifi oya hokolola tai ti omulumenhu weedula 58, okwa nyekwa vati oshimaliwa konima eshi a nana oshimaliwa osho tuu eshi po Bank Windhoek poshitaasi shaShakati.
Opolifi otai hokolola tai ti nakuningwa oshihakanwa okwa li a shinga otuwa okudja kombaanga a uka kUupindi aka tale ko oipumbiwa yaye imwe ashike vati opo ashike eli po, okwa dja ashike okatukala kamwe oko ka tula otuwa yaye komesho ndele umwe temu ulike ondjebo nokumu kufa oimaliwa.
Konima vati omwa dja ovalumenhu vavali, umwe natango e na odjembo nokumukufa okadjato oko kwali ke na oshimaliwa.
Ovafekelwa ove mu nyeka yo eeshapi dotuwa nokandjato kaye kanini omo mwa li muna N$1 000 osho yo elyenge laye mofingo.
Otaku hokololwa pehe nao u a monifwa oshiponga.
Shilelo okwa kumaida oshiwana opo shi kale shi li oupafi ngeenge tashi di kombaanga.
“Ka le ni ta mu keuka kutya konima yeni otaku di lyelye shaashi paife eembudi odi hole okulandula ovanhu manga taa di mombaanga fiyo okoku wa uka,” ta ti.
Okwa ti ngeenge omunhu otadi kombaanga ndele ta mono omunhu e li motuwa ile keemadi e mu landula, na dengele opolifi meendelelo.
The post Puleni opolifi i mu findikile ngeenge tamu ka nana oimaliwa- Shilelo appeared first on New Era.