TURA: Gambegre C&RD Block-ni Integrated Block Development Complex (IBDC)-ko Bristibar salo, a·dokni Chief Minister Conrad K Sangma nokdonggae on·angaha aro ia Block office-ko nokdonggaanio, Gambegre-ni MLA Mehtab Chandee A Sangma-ba dongpae bak ra·angaha.
Ia gital rikgipa Block office-ko nokdonggae on·anganio, a·dokni Chief Minister, jinmana aganprakangengon, a·dokni pilak dam 56 C&RD Block-rangon gital office nokrangko rike aro taridape on·enga ine parakataha.
Sorkarini bang·bata scheme-rangkon block office-rang gitasa chu·sokate on·ani gimin block office-rangna namgipa nokrangko nangchongmota aro sorkari, pilak block-rangon office nokrangko gital rike aro taridape da·o nokdonggae on·engaha ineba Chief Minister aganaha.
Ia gital Block office-ko, Integrated Block Development Complex ine mingani gimin talataniko on·angengon, ia office-o caste certificate, EPIC pilak nangchongmotgipa lekkarangko tarie on·an baksana manderangna dingtang dingtang kamrango dangdike on·na gita ia office nokko IBDC mingaha ine Chief Minister parakataha.
Ia IBDC-rango bakan sorkari, CM Connect Centre-rangko kulie on·gnok ineba Chief Minister parakataha.
Manderangna ka·sae aro kakket ong·e dangdike on·angkuchina gitaba Chief Minister, Block office-rango kam ka·enggipa pilak manderangkon didiangaha.
Gambegre C&RD Block-ni IBDC-ko gong kror gittam koros ong·e rikaha aro ia block office-ba 2022-2023 bilsio sorkarini sanction ka·gipa dam 40 block-rangoni damsa ong·a.
Ia gital Block office-ko nokdonggaanio, Gambegre-ni A·king Nokma Chekme Ch Marak-ba ribbon ratanio, a·dokni Chief Minister aro Gambegre MLA baksa dongpaaha. Ia gital office nokna jaksrambee a·arangko on·gilahani giminba a·dokni Chief Minister, A·king Nokma aro uni Mahariko mittelpilangaha.
Gambegre-ona re·anganio a·dokni Chief Minister, gital rikgipa digital library aro gital kuligipa SBI-ni ATM-koba oprake on·angjolaha.