TURA: Tura, District Maternity & Child Hospital (DMCH)-o, an·o donggipa ma·gipa aro bi·sarangko nirok simakani, sana banani cholrangko bilakbatatna gita Rogi Kalyan Samiti (RKS)-ni kamrangko nipilangna gita, West Garo Hills a·jani Deputy Commissioner Vibhor Aggarwal-ni dilanganichi tom·aniko ong·atangaha. Ia tom·anio, hospital-ni kam ka·anirangko nirok sandiangani, bi·sa aro ma·giprangni an·seng baljokanina nambata nirok simsakanirangko bilakbatatna nanggipa kamrangni bidingo apsan chanchirimanganiko dakangaha.
Ia tom·anio mongsonggipa kamrangni gimin chanchirimangengon jedake, an·o donggipa ma·giparangni an·pakani somoirango neng·nikanirang donggipa ma·giparangko nirok sandiani, NRC-ni infrastructure aro kamrangni gimin, Operation Theatre-ko namdapatani, hospitalo kam ka·giparangni chu·onggijani, MHIS-ni ning·o man·a kragipa manderangna indin samrangko suale on·ani, 50-bedded hospital building-na tarisamsoanirang, ultrasound service-rang, central oxygen supply aro una agreba CMSMS baksana MHIS-ni ning·o tangka paisarangko jakkalani gimin nipilangangenba apsan chanchirimganiko dakangaha.