ONDANGWA- Oshibofa shomutamanekwa Sinkus Johannes weedula 59 o u ta tamanekelwa edipao lamwene womukunda Onelago oo yo ali kapatashu womukunda Iikokola moshitukulwa shaShikoto Sam Nepando osha undulilwa komesho.
Oshibofa osha unduliwa komafiku 22 fiyo 23 omwedi o u, nelalakano lokuninga eindilo lokulifutila mo modoolongo.
Okwa holoka momhangu yaNdangwa onghela lwoshikando oshitatu.
Opolifi oya hokolola kutya Johannes natango okwa monifa oshiponga omukulunhuwiliki wehangano ha li ningi omafaneko eeproyeka depangelo loNational Planning Commmission I-Ben Nashandi eshi a yashwa nondjebo efiku olo tuu olo loshiningwanima.
Johannes omukalimo womomukunda Iikokola okwa taalela oibofa ine: oshibofa shedipao, shokuyasha nokukendabala okudipaa, okuya oilonga yoiyuuki moshipala, osho yo okulongifa oshifufuta inashi pitikwa.
Otaku hokololwa Johannes a yasha nokudipaa Nepando osho yo okukendabala okudipaa eshi a yasha Nashandi neudo mu Januali efimbo lokomatango.
Oshiningwanima eshi osha ningilwa momukunda Iikokola moshitukulwa shaShikoto.
Eshi osha holoka konima eshi vati a li ta pulwa oshipambu shedu osho elikufila momukunda omo tuu omo.
Otaku hokololwa vati omutamanekwa eli kufila edu, a wedela kekove laye shi heli paveta, shoo osho sha li sha eta mwene womukunda nakapatashu va pwilikine vo va longe oilonga yavo oyo veli neekelelwa momukunda omanga i na kufa mo ondjebo ndele teva yashe.
Ookaume osho yo ovakwapata va Nepando onghela okwa li va holoka komhangu tava nyenyeta tava ti omutamanekwa i na pumbwa okupewa omhito yokulifutila mo modolongo shaashi okwa longa oshimbuluma sha kula.
Ova popya kutya itashi ulike efano liwa ngeenge okwa di mo modolongo shaashi pamwe natango ota dulu okulonga oshimbuluma sha faafa.
Ova pula omhangu opo i kale ya yandje eedula dihapu modolongo komutamanekwa o u.
-fhamalwa@nepc.com
The post Oshibofa medipao lamwene womukunda sha undulilwa komesho appeared first on New Era.