Gambegre, Oct 22: Gambegre C&RD Block-ni Integrated Block Development Complex (IBDC)-ko Bristibar salo, Meghalaya a•dokni Chief Minister Conrad K Sangma, Gambegre-ni MLA Mehtab Chandee A Sangma-ni dongpaanio nokdonggae on•angaha.
Ia gital Block office-ko nokdonggaanio, Gambegre-ni A•king Nokma Chekme Ch Marak-ba ribbon ratanio, a•dokni Chief Minister aro Gambegre MLA baksa dongpaaha. Ia gital office nokna jaksrambee a•arangko on•gilahani giminba A•king Nokma aro uni ma•drangrangna Chief Minister, mande ra•pilskaaniko on•angaha.
Gambegre-ona re•anganio a•dokni Chief Minister, gital rikgipa digital library aro gital kuligipa SBI-ni ATM-koba oprake on•angjolaha.
Ia program-ko ong•atanio a•dokni Chief Minister, tom•anio dongpae bak ra•giparangna aganprakangengon, Meghalaya a•dokni itihaso, a•dokni pilak dam 56 C&RD Block-rangon gital office nokrangko rike aro taridape on•enga ine parakataha.
Sorkarini bang•bata scheme-rangkon block office-rang gitasa chu•sokate on•ani gimin block office-rangna namgipa nokrangko nangchongmota aro sorkari, pilak block-rangon office nokrangko gital rike aro taridape da•o nokdonggae on•engaha ineba Chief Minister aganaha.
Block office nokrangko, Integrated Block Development Complex ine mingani gimin talataniko on•angengon, ia office-o caste certificate, EPIC pilak nangchongmotgipa lekkarangko tarie on•an baksana manderangna dingtang dingtang kamrango dangdike on•na gita ia office nokko IBDC mingaha ine Chief Minister parakataha.
Ia IBDC-rango bakan sorkari, CM Connect Centre-rangko kulie on•gnok ineba Chief Minister parakataha.
Manderangna ka•sae aro kakket ong•e dangdike on•angkuchina gitaba Chief Minister, Block office-rango kam ka•enggipa pilak manderangkon didiangaha.
Gambegre C&RD Block-ni IBDC-ko gong crore 3 koros ong•e rikaha aro ia block office-ba 2022-2023 bilsio sorkarini sanction ka•gipa dam 40 block-rangoni damsa ong•a.
Gambegre Block-ni gital office nokko nokdonggaanio, Gambegre-ni MLA Mehtab Chandee A Sangma-ba aganprakangengon, block office-rang gitasa sorkari, songni nokni manderangna dangdike on•enga ine a•dokni pilak C&RD Block-rangon gital office nokrangko rikna aro taridape on•na kam ka•engani gimin Chief Minister-ko mittelpilangaha.
The post Gambegre-ni Integrated Block Development Complex-ko CM nokdonggae on•a appeared first on Hub News.