Jirang Block-ni gital Integrated Development Complex-ko nokdonggae on·angjola
SHILLONG: Ri Bhoi a·jani Patharkhmah-o Mini Secretariat-ko rikna gita Sombar salo, a·dokni Chief Minister Conrad K Sangma, pangchakaniko songe on·angaha aro apsan salon, Jirang Block-ni gital Block Integrated Development Complex (BIDC)-koba nokdonggae on·angjolaha.
Ia program-ko Patharkhmah-ni Western Ri Bhoi Football Ground-o ong·ataha aro ia tom·anio, Patharkhmah Senior Secondary School aro Patharkhmah Model Degree College-ni gital building-koba nokdonggae on·angjolaha.
Jirang Block-ni gital BIDC-ko India-ni Women’s National Football Team ba India a·songni robol kal·gipa me·chik dolni goalkeeper Ribansi Jamu, a·dokni Chief Minister aro gipin dilgiparangni dongpaanio, nokdonggae on·angaha.
Jirang C&RD Block-ko 2001 bilsini March 24 tariko, Patharkhmah-ko headquarter dake kuliaha aro ia gital Block Integrated Development Complex (BIDC)-na, 2023 bilsini October 27 tariko pangchakaniko songenba da·o ia gital office nokko nokdonggae on·angaha.
Ia program-ko ong·atanio a·dokni Chief Minister, jinmana aganprakangengon, a·dokni bang·bata block office-rangon office nokrang dongjani gimin aro mitamranga gitchame nosto ong·ahani gimin da·o pilak block office-rangkon gital rike on·engaha aro mitamrangkoba taridape on·engaha ine parakataha.
Robol kal·anio Ribansi Jamu-ni chu·sokanirangna aro a·dokna on·gilanirangna mittelpilangskaengon, ia block office-ko uni jakchi nokdonggae on·aniara namen krabegipa ong·aha aro uni robol kal·na changanian, a·dokni gipin chadamberangkoba didiani ong·skaenga ine Chief Minister aganaha.
Patharkhmah-o Mini Secretariat-ko rikna pangchakaniko songani bidingo janapangskaengon, ia biapo Mini Secretariat-ko rikanichi, Patharkhmah Civil Sub-Division-ni pilak office-rangkon ia apsan campus-ona ra·bagnok aro manderang, an·tangtangni nanga kamrangna dingtang dingtang biaprangona re·na nangjawaha ine Chief Minister aganaha.
Batanggimin sal somoirango an·tangni Patharkhmah-ona re·bamiting somoirangko gisik ra·atpilengon, Patharkhmah-o da·o rama jal·langrangni namdapaniko aro pilakni gitan namroro silroroaniko nikna man·aha ine Chief Minister, an·tangni kusi ong·aniko parakataha.
Ia program-ko ong·atanio, a·dokni Secretariat Administration Minister Sosthenes Sohtun aro dingtang dingtang official-rangba dongpae bak ra·angaha.