TURA: Garo Hills Autonomous District Council (GHADC) election-o susana gita Schedule Tribe (ST) Certificate-ko nangchongmotgipa dakatna aro Separate Electoral Roll (SER) ba dingtang electoral roll-ko tarichina A·chik jat gimik ku·monge dabianirang chu·sokgipa ong·ahani gimin kusi ong·ani bak gita Sukrobar salo ‘Jatni Mikgaoani Sal’ ine donenba, program-ko Tura songjinmani New Tura, Matchakolgre L.P School kal·chakramo ong·atangaha.
Ia program-ko Nangrimgimin A·chik Dol (NAD)-ni ning·o, GSMC, AIGU, DINDAM, ADIL, ACHIK, GES, NGCO, ANYO, CSAWO, AAYF, AGTHEA, GOERA, GSU aro dingtang dingtang dolrang nangrime ong·atangaha. Ia program-o GHADC Election-o susana ST Certificate-ko nangchongmotgipa dakatna dakgrikanio aro Separate Electoral Roll-na dakgrikanio an·tangtangko on·kange dakgrikdilanichi, pattoko donako man·giparang, pattoko donako man·jaoba iani bidingo case ka·a man·giparangko aro NAD-o donggipa pilak dolrangni dilgiparangko mande ra·pilskaaniko dakangaha.
Ia program-o dingtang dingtang NGO-ni dilgiparang, dingtang dingtang dake ST certificate-ko nangtelgipa ong·atna aro SER-na dabianio neng·nikanirangko aganangenba, ia kamo chu·sokgipa ong·na man·ahani gimin A·chik a·songni manderangko mittelpilangaha.
Iana agreba Khasi aro Jaintia Hills-oni Confederation of Meghalaya Civil Society Organisation (CoMSO)-ni bak ong·e dingtang dingtang dilgiparangba ia program-ona re·bae bak ra·angpaenba, A·chik jatni chu·sokgipa ong·ani gimin kusi ong·chakani kattarangko aganangaha.\
Ia tom·bimonganio dingtang dingtang kamrangni gimin chanchirimangengon, GHADC-ni Election-ko jadokna ra·dodapaniko nie dongjawa indiba iana rakgipa ja·ku de·na gita January 20 tarikni ja·man jinma chanchirime, February jarangni gisepon GHADC election-ko ong·atchina dabianggen ine tik ka·e donangaha.
Bilsiantian October-ni 16 tarikko, ‘Jatni Mikgaoni Sal’ ine manina gitaba ia tom·anio dingtang dingtang dolrang tik ka·e donangaha.
Jinma tom·bimongani ja·man Matchakolgre kal·chakramoni a·bachenge, Araimile, Hawakhana, Babupara, DC, SP office, Tura Bazar, Hawakhana gita Matchakolgre kal·chakramona re·jomangenba matchotataha.