SHILLONG: Shillong Literary Festival-ko Shillong songjinmani Ward’s Lake-o ong·atrongengani gimin Hynniewtrep National Youth Front (HNYF), a·dok sorkariko sing·doatenba, ia Festival-ko ia biapo ong·ataniara, ia Ward’s Lake-ko namdapatna gong kror 25 tangkarangko koros ka·anichi maming namgni dongjaenga ine matnangataha.
Iani bidingo Sombar salo, a·dokni Chief Minister Conrad K Sangma-na sedoatengon, Literary Festival gita dakgipa program-rangko ong·atanichi, ia biapni nitoani aro mingnamaniko nisigalani gita ong·gen ine ia program-ko dingtang biapo ong·atskachina HNYF East Khasi Hills-ni president Stevenson Raymond Khyriem, a·dok sorkariko didiataha.
HNYF-ni parakatani gitade, iandakgipa program-rangko ong·atanio, dingtang dingtang nokrangko rikna nangengani gimin aro bang·a manderangan re·baengani gimin ian Ward’s Lake-ko nosto ka·ani gita ong·enga aro ia biapni nitoaniko rakkina kam ka·anikoba nisigalani gita ong·enga.
Uamang, ia Literary Festival-kode jegalenga ong·ja ine talataniko on·angengon, ia festival-ko State Central Library, State Convention Centre ba Garrison Ground gita dakgipa biaprango ong·atskana man·gen in HNYF, a·dok sorkarina ku·pattianiko on·ataha.
Changdokgipa Shillong Literary Festival-ko ia bilsioba, re·baenggipa November 12 tarikoni November 14 tarikona, Shillong songjinmani Ward’s Lake-o ong·attaina tik ka·ahachim ine nikna man·a.
Ia Festival-o, dingtang dingtang biaprangoni, sena jotna gisik nanggiparang, jakni kamrangko ka·giparang, skigiparang, chatro chatrirang aro gipinrangba re·bae bak ra·na sienga.
Ia Shillong Literary Festival-ko ong·atna Meghalaya sorkarini Tourism Department dakchake on·enga aro ia festival-o India a·songni aro gipin a·songrangni sea jotanirangkoba mesokangna sienga.