ԱՄՆ-ՌԴ համաձայնության շրջանակում ռուսական դիզվառելիքի մի մասը կգնի Թուրքիան. նախարար

Թուրքիան կգնի Ռուսաստանի կողմից համաշխարհային շուկաներ մատակարարվող դիզելային վառելիքի մի մասը՝ Մոսկվայի և Վաշինգտոնի միջև ձեռք բերված համաձայնության շրջանակում, հայտարարել է Թուրքիայի էներգետիկայի նախարար Ալփարսլան Բայրաքթարը։

Նա ընդգծել է, որ համաձայնությունը կարևոր է Թուրքիայի էներգետիկ անվտանգության համար, քանի որ երկրին այս հարցում մասամբ կախված է Ռուսաստանից։

«Վերջին ամիսներին Ռուսաստանը սահմանափակումներ է մտցրել դիզելային վառելիքի արտահանման վրա, երբ սկսեց բախվել այս խնդրին։ Այժմ նրանք համաձայնության են եկել դիզելային վառելիքի վերաբերյալ Թրամփի հետ <…> Մեր բանակցությունների արդյունքում մենք այս դիզելային վառելիքի մի մասը կտեղափոխենք Թուրքիա», - ասել է Բայրաքթարը՝ առանց նշելու ծավալները կամ մատակարարման ամսաթվերը։

Հոկտեմբերի 9-ին ԱՄՆ նախագահ Դոնալդ Թրամփը հայտարարեց, որ համաձայնության է եկել Ռուսաստանի նախագահ Վլադիմիր Պուտինի հետ, որի շրջանակում Ռուսաստանն անհապաղ կմատակարարի ավելի քան 300,000 տոննա վառելիք, ևս 500,000 տոննա՝ նոյեմբերին, մեկ միլիոն տոննա՝ «անմիջապես դրանից հետո» և երեք միլիոն տոննա՝ «շուտով՝ հաշվի առնելով ռուսական նավթավերամշակման գործարանների վիճակը»։

Ռուսաստանում 2026 թվականի հուլիսի 8-ից գործում է դիզելային վառելիքի արտահանման արգելքը։ Թրամփի հայտարարությունից մեկ օր անց Ռուսաստանի փոխվարչապետ Ալեքսանդր Նովակը հայտարարեց, որ Ռուսաստանը կսկսի արգելքի վերացումը «անմիջապես»՝ նախատեսվածից շուտ։ Ավելի ուշ էլ նա հայտարարել է, որ ռուսական դիզելային վառելիքը ԱՄՆ շուկաներ կհասնի պայմանագրերի ստորագրումից 15-20 օր անց։