Oministeli yOilonga nOyeendifo oya popila ouyelele wayo woyeendifo sha landula oidjemo yomavalulo ya kwatela mo oyeendifo i li o53 yepangelo yongushu yeemiliona N$35.5 ihe na apa ya didilikwa, tai ti oyeendifo oya didilikwa membo li lili inai kana nandenande.
Momukanda wokoikundaneki wa shangwa Etitano, oministeli oya ti oyeendifo oya yandjwa keembelewa da yooloka, eeministeli nomahangano nonghee nee oya didilikwa membo omo hamu didilikwa oyeendifo oyo ya yandjwa nale keenhele da tumbulwa ndele kashi fi membo longalashe yepangelo.
Eyeleko eli ola landula ouyelele wa yandjwa kongudu yoIndependent Patriots for Change, tau popi kombinga yoyeendifo ihe mo momambo nosho yo omikanda tadi popi apa ya ya.
“Oyeendifo eshi inai didilikwa membo longalashe yepangelo itashi ti oumbangi kutya oya kana ile inai didilikwa, shaashi oyeendifo oyo ya yandjwa po ihai didilikwa membo omo,” omukanda tau ti.
Oyeendifo ashike i li ihamano yomoyeendifo omo ya landwa koministeli, omanga ikwao ya landwa komahangano akwao epangelo, oministeli tai ti.
Oministeli oya ti omikanda adishe da pumbiwa kukolekwe oshinima eshi opo di li.
Oya koleka yo vali kutya oyeendifo i li o106 oya yandjwa po kOmbelewa yOkutokola manga inai kufwa mo membo longalashe yepangelo kupitikwe ombelewa ei i wilike oyeendifo yayo vene.
Oministeli natango oya ti oumbangi wediminino loshikefa shepangelo lokuyandja po omaano osheendifo shepangelo shonomola 5007 opo u li.
Nande otai popile ouyelele wayo, oministeli oya tambula ko efimano lokudidilika omauyelele omondjila nokulandula omilandu adishe da pumbiwa.
Oya udaneka okunghonopeka ewiliko loyeendifo noya pula eenghundafana dopamufika nombelewa yomuvalulindjai va kandule po omapuko aa e li po manga oindjemo yomavalulo inai manifwa.
The post Oyeendifo inai kana oya didilikwa membola yooloka – oministeli yoilonga appeared first on The Namibian.