Omukulupe weedula 60 ota holoka nena momhangu yamangestrata waMuthiya eshi vati a kwata okakadona keedula 17 onghonga ndele te kape N$50.
Ota pangulilwa oshibofa shekwatonghonga.
Oshiningwanima osha ningilwa vati meumbo lomukulupe neudo omwedi wa dja ko komukunda Omuxulu moshitukulwa shaShikoto.
Opolifi oya holola kutya oshibofa eshi opo ashike sha lopotwa oshivike eshi ndele omukulupe ou ta kwatwa po.
Omukulunhu wopolifi moshitukulwa shaShikoto, Commissioner Ndafudha Iifo okwa koleka onghundana e i.
Opolifi oya hokolola tai ti omukulupe ou okwa lefwa kokakadona aka okudja kodoolopa yaMuthiya ndele te ka twaalele.
Otaku hokololwa kutya omukulupe ohava di pomukunda umwe nanakuningwa oshihakanwa. Otaku hokololwa vati omukulupe a shinga ndele ta pitilile po peumbo opo hapu di nakuningwa oshihakanwa ndele tai nomuhongwa ou keumbo laye.
Okwe ka hekela oshimaliwa shi fike poN$50 ndele te mu longele omunyonena wopaixulo.
Opolifi oya ti okwa didilikwa oibofa yomakwatonghonga hai lopotwa kwa lata osho shi li unene ha shi ningi oilonga yopolifi idjuu okuninga omakonakono.
Oshiwana otashi kumaidwa opo shi lopote oibofa yomakwatonghonga pefimbo molwaashi eshi otashi pitike opolifi i ninge omakonakono omeendelelo noku li mondjila.
Opolifi oya ti osha fimana ngeenge omunhu a kwatwa onghonga a kale a twalwa koshipangelo diva nelalakano lokupewa ouhaku wemeendelelo.
Ovadali onghee ngaa tava kumaidwa opo alushe va kale va kotokela ounona vavo ngeenge tava di mo momaumbo molwaashi ounona paife ova ninga oihakanwa yokukwatwa onghonga kovapambele ile kovashiinda vavo.
-fhamalwa@nepc.com.na
The post Omukulupe vati a kwata omunafikola onghonga: e mu hekela N$50 appeared first on New Era.