Xildhibaanadda Aqalka Wakiillada Mareykanka ee asal ahaan Soomaalida ah, Ilhaan Cumar, ayaa ka hadashay baaritaan ay…
13 October, 2026
Xildhibaanadda Aqalka Wakiillada Mareykanka ee asal ahaan Soomaalida ah, Ilhaan Cumar, ayaa ka hadashay baaritaan ay saraakiil federaal ah ku sameeyeen gurigeeda ku yaalla Washington, D.C. iyadoo sheegtay inay nabad qabto, isla markaana aan laga joojin karin inay aragtideeda siyaasadeed dhiibato, ayna tallaabadaasi u aragto cadaadis siyaasadeed oo la xiriira mowqifkeeda ka dhanka ah Madaxweyne Donald Trump.
Qoraal ay ku baahisey barteeda X ayey Ilhaan Cumar ku sheegtay in baaritaanku qayb ka yahay isku day lagu beegsanayo dadka siyaasadda ka soo horjeeda maamulka Trump, iyadoo ka digtay in awoodda hay’adaha fulinta sharciga loo adeegsado dano siyaasadeed, ayna eedaha kaga imaanaya Donald Trump yihiin kuwa aan sal iyo raad lahayn.
“Waan fiicanahay. Shaki kuma jiro, tani waa isku day lagu beegsanayo dadka siyaasadda ka soo horjeeda iyo in awoodda hay’adaha fulinta sharciga federaalka loo adeegsado dano siyaasadeed. Toban sano ayuu Trump igu hayey been aan sal lahayn iyo olole sumcad-dil ah. Tani waa tallaabadii ugu dambeysay ee sii xoojinaysa ololaha cabsi-gelinta siyaasadeed. Layma aamusin doono”, Ayey tiri xildhibaan Ilhaan Cumar.
Dhanka kale, Madaxweyne Maraykanka Donald Trump ayaa sheegay inuusan wax lug ah ku lahayn baaritaanka, isaga oo arrinta u daayay Wasaaradda Caddaaladda, iyadoo xafiiska Ilhaan markale ku celiyey inuusan jirin waxqalad ah oo lagu haysto marka laga yimaado danaha siyaasadeed iyo cabburinta fekerkeeda.
Baaritaanka ayaa la sheegay in ay sameeyeen saraakiisha Waaxda Baaritaannada Amniga Gudaha Mareykanka (HSI) subaxnimadii Isniinta, 12-ka Oktoobar 2026, iyagoo fulinaya amar baaritaan oo maxkamaddu oggolaatay, iyadoo lala xiriirinayo baaritaanka dukumentiyo socdaal iyo su’aalo ku saabsan xogta socdaalka ee qoyskeeda.