SHILLONG: December 5 tarikoni December 12 tarikona, Uzbekistan a·songni Tashkent songjinmao ong·atenggipa World Pencak Silat Championship 2026-o bak ra·na re·angenggipa A·chik me·tra Rimchi Sangma-na University of Science & Technology Meghalaya (USTM)-ni Chancellor Mahbubul Hoque, una poraianirango dakchake on·na parakataha.
Rimchi-ni Pencak Silat kal·susana re·anganio an·tangni namgipa skaniko on·atengon, una USTM-ni gita dingtang dingtang dakchakanirangko on·na gitaba Hoque, ku·rachakaniko on·ataha.
USTM-ni dakchakaniko on·aniara, ia A·chik me·trana uni kal·susaanio aro poraianirango koros ong·anikoba komiatna dakchakani ong·gnok.
Rimchi-ni USTM-ona re·angon, uko, uni ma·a paako aro una skie on·enggipa coach-ko USTM-ni Chancellor, mande ra·bee rimchaksoaha. Ia USTM-o poraienggipa adita sak A·chik aro Khasi chatro chatrirangba Rimchi-ko gronge, uni ia World Championship-o susana re·anganio, an·tangtangni namgipa skanirangko on·attokaha.
USTM-o mande ra·bee rimchaksoako man·ani ja·man kobor ra·timgipa manderang baksa agangrikengon, uni Uzbekistan a·songona re·angna tarisoanio, una dakchakanirangko on·ahani gimin Rimchi, dingtang dingtang media-rangko mittelpilangaha.
“Angna media-ni manderang dakchake on·aha aro angni gimin koborrangko u·iatani ja·man, anga bang·a manderangni dakchakanirangko man·na a·bachengaha. Iana anga dingtangmancha media-ko mittelpilna ska,” ine Rimchi aganaha.