ԱՄՆ-ի պատերազմի նախարարությունը նախատեսում է այս տարի 50 միլիարդ դոլար խնդրել Կոնգրեսից անօդաչու թռչող համակարգերի զանգվածային արտադրության և Զինված ուժերում դրանք ինտեգրելու համար, Վաշինգտոնում ԱՄՆ բանակի ասոցիացիայի (AUSA) տարեկան հանդիպման ժամանակ հայտարարել է պատերազմի նախարար Փիթ Հեգսեթը։
Նախարարն այս ֆինանսավորումը նկարագրել է որպես միանվագ ներդրում, այլ ոչ թե կանոնավոր տարեկան հատկացում: Հեգսեթն ասել է, որ սա նմանատիպ տեխնոլոգիաները շատ ավելի մեծ մասշտաբով հասանելի դարձնելու ջանքերի մաս է կազմում:
«Արդյունքում, այս տարի խոսքը կլինի հարյուր հազարավոր անօդաչու թռչող սարքերի մասին, իսկ առաջիկա տարիներին՝ միլիոնավորների։ Մեր գերատեսչությունը երբեք նման տեմպ չի տեսել», - ասել է Պենտագոնի ղեկավարը։
50 միլիարդ դոլարի գումարը ներառված չէ Պենտագոնի 2027 թվականի ֆինանսական տարվա հիմնական բյուջետային հայտում, որն արդեն իսկ ներառում է 53.6 միլիարդ դոլար «Անօդաչու թռչող սարքերի գերիշխանություն» (Drone Dominance) նախաձեռնության համար:
Այն նախատեսում է անօդաչու համակարգերի ձեռքբերում, անօդաչու թռչող սարքերի դեմ պայքարի հնարավորություններ, հակառակորդական միջավայրերում լոգիստիկ աջակցություն և տեխնոլոգիաների զարգացում։
ԱՄՆ պատերազմի նախարարը նշել է, որ Պենտագոնը պետք է հեշտացնի նոր ընկերությունների մուտքը պաշտպանական շուկա, ուր երկար ժամանակ գերիշխում էին խոշոր, կայացած կապալառուներն ու թանկարժեք հարթակները։
Փիթ Հեգսեթը նշել է, որ պաշտպանական ոլորտի ավանդական ընկերությունները շարունակում են կարևոր մնալ, բայց գերատեսչությունը նաև կարիք ունի ավելի էժան համակարգերի, որոնք կարող են արտադրվել զանգվածային մասշտաբով։