EENGODI- Ovahongifikola kofikola Oshikondeilwa Primary moshitukulwa shaShikoto ohava nangala meebashu va tila omayoka eshi mofikola yavo mwa dipawa eyoka lonhoka la hangika mombelewa yovahongi.
Ofikola Oshikandoilwa oi li momukunda Elambo, moshikandjohoololo Eengodi, moshitukulwa shaShikoto.
Omukulunhufikola pofikola opo tuu opo, Rafael Hashiyana okwa koleka onghundana e i ta ti eyoka ola dipawa Omaandaxa efimbo lomutenya.
Okwa ti oshiningwanima eshi osha tilifa ovahongifikola osho yo ovanafikola eshi mombelewa mwa hangika onhoka.
Okwa hokolola ta ti eyoka e li ola hangika le li tonyena moshipakete shi li koshi yoshitaafula mombelewa. “Umwe womovahongifikola okwa ka uda ashike oshinima tashi li nyenge moshipateke.
Eshi a tala mo mboli omu na eyoka la kula, la dama mo omesho, la e ta ko omutwe,” ta ti. Okwa ti efiku olo ovahongifikola ova faduka po tava kuu va u ka pondje.
“Otwa ufana ovakwashiwana ndele eyoka ta li dipawa. Eyoka ola xwikwa po konima eshi la dipawa,” ta ti.
Hashiyana okwa hokolola ta ti ovahongifikola natango itava longifa ombelewa e i ashike ove li mo va tila mo.
“Mombelewa otwa kufa mo oinima aishe ndele ta mu wapalekwa,” ta ti.
Okwa yelifa ta ti ofikola yavo oi li momufitu osho yo pondobe yomeva aa talama konima eshi kwa lokwa oshivike sha djako.
“Ohatu li pula kutya eyoka e li ola dja momufitu konima eshi kwa lokwa shaashi eenhoka ka di hole moixwa ngeenge ku na odula,” ta ti.
Kombinga ikwao, omukunhufikola okwa ti otave li pula kutya eyoka mombelewa ola yamo ngahelipi molwaashi omakende ombelewa okwa kala a idila efimbo keshe. “Omapulo okwa ninga mahapu kombinga yeyoka e li molwaashi mofikola ina mu monika nande omufinda weyoka la uka mombelewa,” ta ti.
Hashiyana okwa ti ovahongifikola otava twikile okuyandja eetundi kovanafikola nonande ve na oumbada.
-fhamalwa@nepc.com.na
Onhoka… Ovanhu ve kwete eyoka lonhoka olo la dipawa kofikola Oshikondeilwa Priamry.
Efano: Otwe li pewa
The post Onhoka ya hangika mombelewa yovahongifikola appeared first on New Era.