Սյունիքի մարզի Շաքի գյուղ հոկտեմբերի 1-ին ադրբեջանցի զինծառայողի ներթափանցումից և բնակիչներից Անի Ավետիսյանին ծանր վնասվածքներ հասցնելուց հետո, Պաշտպանության նախարարությունում պաշտոնանկություններ են տեղի ունեցել:
Վարչապետի առաջարկությամբ անցած շաբաթ նախագահը պաշտոնանկ արեց Հատուկ բանակային կորպուսի հրամանատարի տեղակալ, գնդապետ Արծվիկ Գրիգորյանին: Նա զբաղեցնոմ էր բանակային կորպուսի հրամանատարի մարտական հերթապահության գծով տեղակալի պաշտոնը:
«Ազատության» տեղեկություններով՝ այս պաշտոնանկությունը ևս կապված է Շաքիի դեպքերի հետ: Նշենք, որ Հատուկ բանակային կորպուսը ծառայություն է իրականացնում հենց Սյունիքի մարզում:
Արծվիկ Գրիգորյանը հասցրեց պաշտոնավարել ընդամենը մեկ տարի: Հատուկ բանակային կորպուսի հրամանատարի տեղակալի պաշտոնում նա նշանակվել էր 2025-ին:
Այս պաշտոնանկությունից բացի, օրեր առաջ, «Ազատության» տեղեկություններով, պաշտոնից ազատվել էր նաև Ռազմական ոստիկանության Սիսիանի բաժնի պետը:
Ավելի վաղ, Շաքի գյուղ ադրբեջանցի զինծառայողի ներթափանցումից հետո,
վարչապետի որոշմամբ պաշտոնանկ էր արվել Ազգային անվտանգության ծառայության տնօրենի տեղակալ, գեներալ-մայոր Դավիթ Սանամյանը: Սանամյանի հիմնական պատասխանատվության ուղղությունը ԱԱԾ Սահմանապահ զորքերի համակարգումն ու վերահսկողությունն էր։
Ըստ Բաքվի` ադրբեջանցի զինծառայող Նասիմի Մուսաևը սեպտեմբերի 26-ին ինքնակամ լքել էր Լաչինի զորամասը: Նա հոկտեմբերի 1-ին մտել էր Սյունիքի Շաքի գյուղի տներից մեկը, կրակել տանտիրուհու վրա՝ նրան ծանր վնասվածք պատճառելով: Նրան առաջինը իրենց տանը հայտնաբերել էին Անի Ավետիսյանը երեխաները: Մայրը, ըստ հարազատների, երեխաների պաշտպանելիս ոտքի և ձեռքի վնասվածքներ է ստացել: Այդ ընթացքում նաև Անի Ավետիսյանի որդու դաստակն էր կոտրվել:
Երկու ամսով կալանավորված ադրբեջանցի զինծառայողը մեղադրվում է սահմանը ապօրինի հատելու, զենքի մաքսանենգության, զենքի գործադրմամբ առողջությանը ծանր վնաս հասցնելու և բնակարանի անձեռնմխելիությունը խախտելու համար: Ադրբեջանում նրան մեղադրում են դասալքության համար: