ONGWEDIVA – Omukainhu weedula 23 okwa ti okwa tota po ongeshefa yaye yokuninga oipanyala, eemafu nokuwapaleka ovanhu moipala okudja moshimaliwa osho ha pewa koNamibia Students Financial Assistand Fund (NSFAF).
Mirjam Nghimwenavali paife omunangeshefa eli fikamena po kuye mwene.
Nghiwenavali okwa ti omadiladilo okutota ongeshefa okwa dja nale okudja peedula omuwoi eshi a tameka okukala ta landifa ouleke pomudingonoko osho yo kuvakwao kofikola.
“Shaashi haame naana nda dja pepata loondiinyaa ndiihanga, eshi nda ya koshiputudilo onda yako nale nedilaadilo kutya oimaliwa yange yoku li yambidida e i handi ka pewa kepangelo ngeenge yeya ohandi kei longifa shike,” ta ti. Okwa twikila kutya manga ali a teelela oimaliwa yaye yotete i uye, okwa hangika eke li deula shaashi okwe li hongela ouhongifikoa koshiputudilo sha Unam.
“Oimaliwa yange yotete eshi yeya onde i tula mongeshefa yokuwapaleka oipanyala, okutula ovanhu eemhafu osho yo okukosha ovanhu moipala,” ta ti.
Okwa twikila ta ti okudja opo ongeshefa yaye oya kala tai ende nawa naalushe oha kala ashike ena sha shoku li kwafa nasho mondjato.
Nghimwenavali okwa ti ongeshefa yaye okwa kala hei shingifa komapandja okomalungula neecustoma daye oda kala hadi mu dengele okudja komalungula.
Efimbo limwe ngeenge a wapaleke ovanafikola vakwao keemhadi noku va tula oipanyala osho yo eemhafu, oilonga yaye ohai kala ili wetikile, novanafikola ohava lombwelafana ve uye ve mu yambidide mokuninga oipanyala, eemafu ile okuwapalekwa moshipala.
Nghimwenavali okwa ti nena oku li umwe womovanangeshefa va tave shi endifa nawa monooli.
“ Ongeshefa yange paife oya kula shaashi ondi na osalona yange mwene omo mu na oipundi hadi i haila kovanhu vo tava futu nge komwedi,” ta holola ngaho.
Okwa twikila kutya natango oha mbabeke yo ovanhu moipala, ye taka yofa oupana keehango, nokuninigila ovafuko oikulya yokongolo oyo hai liwa ongula manga omufuko inaya kongeleleka.
“Omauwa aeshe aa okwa dilila nge ashike moimaliwa yange ya NSFAF shaashi i na di i danena eshi yeya ndele onde i tula mwaasho tashi dulu okukwafa nge apa ndili nena,” ta ti.
Ashike nande ongaho, ka pe na ongeshefa i he na omashongo.
Nghimwenavali okwa ti okwa kala ha longo noudjuu ngeenge tashi ya koilonga yaye yofikola osho yo ongeshefa yaye shaashi iha mono efimbo la wana okuwanifa po oilonga yaye yofikola.
Okwa ti fimbo limwe oha dulu okumona eecustoma ta diya kuye pefimbo eli meetundi ashike ngeenge okwe li hange ehe na oshimaliwa, oha fiye po eetundi opo aka nyange ye a tale kutya oilongwa ote kei monena efimbo ngahelipi.
“Ashike nande ongaho ina ndi sholola, onda kendabala okuundula opo ndi mane yo ofikola yange pefimbo,” ta ti.
Okwa twa ovanyasha vakwao omukumo opo va diinine ehongo nokutula oimaliwa yavo oyo hava pewa kepangelo oshali shamuhongi moinima tai tungu.
-taimihaihambo2000@gmail.com
The post A tota ongeshefa yaye moimaliwa yaNSFAF appeared first on New Era.