Anna Heita oo eli omukalimo waNdangwa moshitukulwa shaShana okwa ti okwa tameka ongeshefa yokukuna eengala konima yeumbo laye onga oufuuli ashike, ashike paife odo hadi mu etele omboloto poshitaafula shaye.
Heita okwa ti elandifo leengela kala li imwe yomeendjodi daye. Okwa ti ediladilo lokukuna eengala ole ya mo ashike ongomashendjo muye.
“Onda tameka ashike handi kunu eengala ngahenya onga uufuli konima yeumbo lange shaashi ondi hole onhele yaziza neenghono,” ta yelifa.
Okwa weda po ta ti konima okwa ka kala ena ovashiinda shaye have ya okuteka eengala kuye vaka wapeke omaumbo avo nosho tuu.
Okudja opo okwa kwa twa kedilaadilo lokukala ha landifa eengala daye opo a dule okueta omboloto poshitaafula.
Heita okwa ti omadilaadilo ongeshefa okwe a longwa kuina oo a kala ha landifa oukuki neeshi da kangwa.
“Pefimbo meme elipyakidila ta landifa eeshi noukuki, ame ohandi ende nomaumbo nda tya oshiyaxa shomatama komutwe handi konghola pomaumbo ame handi maneko omapandaanda handi landifa,” ta ti.
Okwa twikila kutya omadiladilo ongeshefa okwa dja nale nao manga ali munini lela.
Heita okwa holola kutya ongeshefa yaye yeengala oya ninga efimbo tai ende nawa. Omunangeshefa o u okwa holola kutya ongeshefa yaye oye mupa oyuuyemo ya wana omo a landa mo yo vali eshina lokuninga eekopi.
“Nale ovanhu ova li hava ende oinano ile tava ka ninga eekopi ashike paife ngaha oha veya ashike okuninga eekopi popepi lela,” ta ti.
Heita okwa ti okwa pondola okuyandja eemhito doilonga kovakalimo vavali molwa eengeshefa daye.
Ta ti umwe oha kala pombelewa apa hapu ningwa eekopi omanga mukwao te mu kwafele okulandifa eengala.
“Ongeshefa yange yeengala oya kula paife omo nokuli handi mono omahangano a kula osho yo oivilo ya kula tai ya okumbestela eengala domwenyo naadi di hefi domwenyo kwaame,” Heita ta ti.
Okwa ti ondjodi yaye okupatulula eefitola dihapu deengala konooli efiku limwe.
-taimihaihambo2000@gmail.com
The post Ongeshefa yeengala tai tula omboloto poshitaafula… a kuna eengala konima yeumbo appeared first on New Era.