Rusiya ordusu oktyabrın 18-i axşam saatlarında Ukraynanın paytaxtı Kiyevə ballistik raketlərlə hücum edib.
Bu barədə UNİAN Kiyev meri Vitali Kliçkonun açıqlamasına istinadən məlumat yayıb.
Kliçkonun sözlərinə görə, Desnyanski rayonunda tibbi mərkəzin binasına, Dnepr rayonunda isə qeyri-yaşayış binasına zərbə endirilib. Hücum nəticəsində 21 yaşlı qadın həlak olub, üç nəfər yaralanıb. Yaralılardan ikisi şəhər xəstəxanalarına yerləşdirilib.
Kiyev Şəhər Hərbi Administrasiyasının məlumatına görə, Dnepr rayonunda təhsil müəssisələrinə də ziyan dəyib. Hadisə yerlərində fövqəladə hallar xidmətlərinin əməkdaşları işləyiblər.