ҲИСОР, 22.10.2026 /АМИТ «Ховар»/. Дар шаҳри Ҳисор нақшаи тадбирҳои омодагӣ барои дар сатҳи зарурӣ гузаронидани давраи тирамоҳу зимистон тасдиқ гардида, Ситоди шаҳрӣ оид ба сари вақт омода намудани соҳаҳои иқтисодиёт ва иҷтимоиёти ҷамоатҳои шаҳраку деҳоти шаҳр барои фаъолияти мунтазам ва самарабахш дар давраи тирамоҳу зимистони солҳои 2026-2027 таъсис дода шуд.
Тавре ба мухбири минтақавии АМИТ «Ховар» аз Мақомоти иҷроияи ҳокимияти давлатии шаҳри Ҳисор хабар доданд, барои иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2026-2027» дар 141 муассисаи таълимӣ ва 15 муассисаи томактабии шаҳр 2277 тонна ангишт, 644 метри мукааб ҳезум ва 1430 литр сӯзишвории дизелӣ захира карда шудааст.
Талаботи муассисаҳои таълимӣ ва муассисаҳои томактабӣ барои тирамоҳу зимистон дар шаҳри Ҳисор 2290 тонна ангишт, 622,1 метри мукааб ҳезум ва 7800 литр сӯзишвории дизелӣ мебошад. Дар муассисаҳои таълимии шаҳри Ҳисор аз 47 буғхона 33 адад дар ҳолати корӣ қарор дошта, 145 гармкунаки барқӣ ва 2050 бухорӣ омода мебошанд.
Барои дар сатҳи баланд гузаронидани давраи тирамоҳу зимистони дарпешистода аз ҳисоби буҷети шаҳри Ҳисор барои харидани ангишт ва ҳезуму сӯзишворӣ 2 миллиону 716 ҳазору 229 сомонӣ пешбинӣ ва пурра ҷудо гардидааст.
Дар соҳаи тандурустии шаҳри Ҳисор тибқи маълумот ба миқдори 32 метри мукааб ҳезум, 200 тонна ангиш ва 1600 литр сӯзишвории дизелӣ захира карда шудааст. Инчунин 34 генератори барқдиҳанда, 200 гармкунаки барқӣ ва 165 бухорӣ дар ҳолати корӣ қарор доранд.
Дар шаҳри Ҳисор 23 муассисаи соҳаи тандурустӣ ба хати озоди барқ пайваст мебошанд.
АКС: АМИТ «Ховар»
Октябрь 22, 2026 09:17