ДУШАНБЕ, 14.10.2026 /АМИТ «Ховар»/. Корхонаи воҳиди давлатии Бонки саноативу содиротии Тоҷикистон «Саноатсодиротбонк» дар номинатсияи «Беҳтарин соҳибкор дар соҳаи бонкдорӣ» ғолиб дониста шуда, бо Диплом ва ҷоиза сарфароз гардонида шуд, иттилоъ медиҳад АМИТ «Ховар».
Имрӯз дар Кохи Ваҳдат Форуми байналмилалии сармоягузории G10 бахшида ба Рӯзи соҳибкорон баргузор гардид, ки дар он Президенти Ҷумҳурии Тоҷикистон муҳтарам Эмомалӣ Раҳмон иштирок намуданд. Дар доираи он Озмуни ҷумҳуриявии «Соҳибкори сол-2026» ҷамъбаст карда шуд.
Кумитаи давлатии сармоягузорӣ ва идораи амволи давлатии Ҷумҳурии Тоҷикистон бахшида Рӯзи соҳибкорон Озмуни ҷумҳуриявии «Соҳибкори сол-2026»-ро аз рӯи 18 номинатсия ҷамъбаст намуд.
Ҳадафи озмун муайяннамоӣ ва қадрдонии соҳибкороне мебошад, ки дар рушди иқтисоди миллӣ, таъсиси ҷойи нави кор, амалӣ намудани технологияҳои муосир, рушди содирот ва татбиқи лоиҳаҳои иҷтимоӣ саҳми арзанда мегузоранд.
Ин дастовард барои Бонки саноативу содиротии Тоҷикистон «Саноатсодиротбонк» нишонаи эътирофи фаъолияти самараноки бонк, саҳми он дар рушди низоми бонкии мамлакат ва дастгирии соҳибкории ватанӣ мебошад.
АКС: Корхонаи воҳиди давлатии Бонки саноативу содиротии Тоҷикистон «Саноатсодиротбонк»