Omukulunhu wehongo moshitopolwahoololo shaHardap Paul Lwin okwa ti omukifi weenyala, eemhadi nokanya oo wa monika mounona vofikola pofikola yedina J&W Mouton Primary School mofaalama Karanas popepi noRehoboth otau wilikwa nawa.
Okwa lombwela oThe Namibian Etine kutya ovanailonga okudja koST Mary Hospital koRehoboth ova talela po ofikola va konakone onghalo.
“Onda teelela ouyelele upe. Ashike paife aishe oi li nawa,” osho a ti ngaho.
Omukifi okwa li wa monika oshivike sha dja ko mounona vofikola ve li o19 ndele tava tuminwa komaumbo opo uha tandavele nofikola aishe, shaashi ohau tandavele okupitila mekwatafano novanhu ve u na nosho yo poima pa li omunhu e u na.
Omukunhufikola okwa shiivifila ovadalai kombinga yonghalo momukanda Etivali.
Okwa ti ovanambelewwa vondjolowele ova taalela po ofikola konima ounona va monika ve na omadidiliko, tava konakona ounona ovo ve na omadidiliko noku va pa omiti.
Ounona ve li 19 okwa li va lombwelwa ve likalele komaumbo oule woivike ivali opo va veluke nokelela omukifi uha tandavele unene.
Omukulunhufikola okwa indila ovadali va fimaneke eameno lounona vavo nonghalonawa manga inava alukila kofikola.
Omukifi ou owa ngwangwaneka oshiwana notashi lipula kutya owa faafana nomukifi wekondo nelaka oo hau kwata ashike oinamwenyo.
Ouyelele wa yandjwa kOministeli yOundjolowele nOmayakulo Opanghalafano Etine otau ti, omikifi edi mbali oda yooloka.
Oya ti omukifi wekondo nelaka ohau kwata oinamwenyo, omanga omukifi weenyala, eemhadi nokanya hau kwata unene ounona, nande omadina otaa monika a faafana.
Oministeli yOunamapya nOunaimuna, Eeshi, Omeva nOmatendululo Omadu nayo oya yandja ouyelele Etine, tau koleke kutya omukifi wekondo nelaka ohau kwata oinamwenyo yomakondo, mwa kwatelwa eengobe, eedi, oikombo, oingulu noifitukuti imwe, ashike ihau kwata nande ovanhu.
The post Omukifi oo wa monika meefikola moHardap otau wilikwa nawa – omukulunhu wehongo appeared first on The Namibian.