RESUBELPARA: Mijal salni bako Kharkutta Constituency-ni MLA aro Meghalaya New and Renewable Energy Development Agency (MNREGA)-ni Chairman Rupert M. Momin, jolni dingtang dingtang biaprango rika cho·enggipa kamrangko re·roroe nirokanganiko dakanga.\
MLA R. M. Momin, skanggipao North Garo Hills a·jani, Rajasimla oni Dokongsi on·a dakanggipa rama Rongdal Atimbo gittim-o RCC dollongko rikenggipa biapona re·ange nirokeaniko dakangaha aro uni ja·man, Rajasimla Government M. E. skul-ni building gital rikenggipa biapona re·ange nirokanganiko dakangaha. Nirokanganiko dakangao, MLA Momin rika cho·ani kamrangko nirokangan baksana namgipa gadango aro somoiranggita ka·enggipa kamrangko matchotate on·china gitaba mol·molangaha.
Una agreba MLA Rajasimla-o Seventh Day Adventist-ni Golden Jubilee-ko manianina tarisamsoenggipa biap-onaba re·angjolange nirokeaniko dakangjolangaha. Ian MLA-ni a·joltangni dingtang dingtang namdapatani kamrangko ka·enganio an·tangni daito-ko jako ra·e gisik nanganiko aro on·kange kam ka·enganiko mesokani ong·a.