SHILLONG: Electoral roll-rangko nipilna Special Intensive Revision (SIR)-ko ka·anio ‘kragija kamrangko ka·enga’ ine matnangenba, Chief Election Commissioner (CEC) Gyanesh Kumar-ko ra·galchina dabie Cockroach Janata Party (CJP), a·songni pilak biaprangon jingjengatanirangko dakengon, CJP-ni dabianio, a·dokni skotong Shillong songjinmani adita chadamberangba chakpaaniko parakattokaha.
A·songni niam bidikko pe·enga ine ma·mong sorkariko jegalatengon, iandakgipa ong·gija kamrangna ku·rang on·enggipa manderangkoba ma·mong sorkari, ‘a·songni kosako chakatgipa’ inesa matnangenba, ia manderangni kosako UAPA gita dakgipa niamrangko ra·gatani cholrang dongaia ine Shillong-ni chadambe Bhakupar, an·tangni jajrengchakenganiko parakataha.
“Ian a·songni niam bidikna namen kragijani aro ra·chakna man·gijani ong·a. CJP-ni member-rang, dingtang dingtang dake ku·rang on·naba gnang indiba uamang, chadamberangni namgninasa ku·rangko on·enga aro uamangni nangnikanirangko sorkari chu·sokate on·na nanga. Jakgitel ong·gipa a·songode, sorkario ong·gipa manderangko sing·doaniara, a·songna aro mikkangchina daitoko mesokanisa ong·a aro ian a·songni kosako chakatani ong·ja,” ine ua aganaha.
Chief Election Commissioner (CEC)-ko jegale jingjengataniara, a·songni on·gimin bilo pangchake jegalaniko mesokanisan ong·aia ine sakgipin Mominul Haque aganskaaha.
Haque-ni aganani gitade, jakgitel ong·gipa a·songo, ong·gija dakgipa kamrangko jegalna Article 19-ni ning·on bilko on·manaha aro jegalgiparangni kosako sorkarini ja·kuko de·aniara kraani ong·ja.
A·songni manderang, maiba kamna suk ong·nikjaenga ong·ode jegalna gita bilrang donga ine sakgipin John F Marbaniang-ba parakataha.
CEC-ni kosako matnanganirangko jakgitel ong·e sandirokatchina HYC-ni gitcham president Robertjune Kharjahrin-ba didiataha aro election-ni kamrangko pangnan kakket aro parak ong·ani gnangsa ka·na nanga ine parakataha.
“CJP aro gipinrang jegalanirangko dakna bil donga. Uamangni kosako sorkarini ja·ku de·aniara uamangni suk ong·nikjae ku·rang on·aniko jripatna jotton ka·anisan ong·aia aro iako a·songni manderang ra·chakna man·jawa. Dilgiparangde, an·tangtangko jegalenggipa manderangkoba knachakna ka·donggipa ong·na nanga. Jegalenggipa manderangko uamang rim·naba gnang indiba ia jingjengataniko uamang jripatna man·jawa. Angni chanchiani gitade, CEC kam watana agre maming chol dongjawaha,” ine Kharjahrin aganaha.