SHILLONG: Lekka pora aro bida budiko man·anian songsalko dingtangatna gita bilakbatsranggipa chol ong·a aro darang songsal ba a·songrangan lekka pora gride, re·mikkangna man·jawa ine a·dokni Chief Minister Conrad K Sangma parakataha.
Sonibar salo, West Khasi Hills a·jani Dorbar Lyngdoh Nonglait Ground-o Mawkyllei College-ni bilsi 15 gapaniko manianio bak ra·engmiting somoio Chief Minister, ia kattarangko aganaha.
Ia college-ni bilsi 15 gapahani gimin an·tangni namgipa skanirangko on·angengon, ian ia college-ko kulidilgipa aro tange rakkienggipa manderangko mittelpilani salba ong·a ine Chief Minister aganaha.
Hopingstone Lyngdoh sagini on·gilanirangko gisik ra·atpilengon, ia college-ko kulianioba uan mongsonggipa mande ong·a ine Sangma aganaha.
2018 bilsionin uni sorkari, lekka porani kamrangna tangka paisarangko bang·bate chame on·anichi, lekka porako namdapatna rake kamrangko ka·baenga ine janapatengon, “Chingni sorkarina lekka poranian mongsongbatgipa daito ong·a aro batanggimin bilsirango chinga dingtanganirangko nikna man·engani gimin namen kusi ong·a,” ine Chief Minister aganaha.
Lekka porani kamrangara altugipa kam ong·a aro bang·en ra·bianirangko chagrongna nanga ine janapatengon, a·doko songdongenggipa pilak manderangkon lekka porako namdapatanio bakrime kam ka·china Chief Minister didiangaha.
Ia college-na Chief Minister’s Special Grant (CMSG)-oniko gong lak 25 aro college-o poraienggipa chatro chatrirangna, doka dam·ani aro kal·susaani bosturangko brena gita Chief Minister, lak 5 tangkarangkoba on·na parakataha.
Ia Mawkyllei College-ko 2011 bilsini June 6 tariko kuliaha aro da·o ia college bilsi 15-ko ga·tapaha.