Omuhondji Euphemia Haukongo okwa holola kutya oku na ondjodi yokunenepeka oshihondjelo shaye efiku limwe.
Haukongo okwa holola kutya okwa kwa twa kohokwe yokuhondja peedula dopedu nopeedula 14 okwa patulukila nale okuhondja.
Okwa ti okwa kwa twa kohokwe yokuhondja okudja meputuko laye omo a kala ta tale eshi ina ta tataula oiyata neshina ye tei tula kumwe a dule okuwaleka oshiwana novanhu veendodo dayooloka mokundjala. “Ngeenge nda mono eshina la meme ta li ndunduma, ame monduda onda limo ngonghela, ndika ondole omesho ange koshihondjelo, ame ndi tale ngeenge handi dipo ngaho nasha,” ta ti. Haukongo okwa ti konima eshi ina a mona kutya oha kala a mbekulwa koilonga yaye, okwa kwa twa kediladilo loku mu longa okutula oiyata kumwe poo opo nee padja ondjila yaye yokuhondja.
“ Kounongo wange wokuhondja onda ka wedelwa ko yo vali kumushiinda shange umwe, oo naye eli katokote mokuhondja,” ta ti. Ashike nande ongaho, ouwa iha uya pokapala kayela. Haukongo okwa ti petameko longeshefa yaye ka li ena eshina lokuhondja osho yo oshimaliwa shokutameka ongeshefa yaye. Okwa twikila kutya molwaashi okwa li ashike ena eedula o 14, okwa kala yo ha pulwa keekastoma ngeenge ota dulu ngaho okulonga oilonga ya ukilila shili.
Ashike nande ongaho okwa kala ashike heli deula ta hondjele eefelende, ovapambele vaye, ye teva pula va andjakanife omafano oilonga yaye komalungula.
“ Oilonga yange yokuhondja osho ya ka tameka oku li monikila. Onda ka haluka ongeshefa yange ndei tembula mo monduda yange yokunangala omu nda li handi hondjele ndele handi li kongele po onhele ishii okutalwa omo handi hondjele oinima yange paife,” ta ti. Haukongo okwa ti paife oha hondjele ovanhu omayovi nomayovi oikutu ili momifololo da yooloka ye mokuhondja natango omo tuu omo, omo hape ovaneumbo pamwe noludalo laye valye.
Ashike nande ongaho oku na ediladilo laye ngeno okunenepek ngaho ongeshefa iye kokule fikulimwe. Ota ti nonande ongeshefa tai ende nawa nokwa mona elunduluko, oku na ehalo lokunenepeka ongeshefa yaye fiku limwe. Okwa twa omukumo ovanyasha vakwao tave li longele opo veli tule mo meengeshefa davo opo va dule okunyangela omaludalo avo.
The post A hala okunenepeka oshihondjelo shaye appeared first on New Era.