Rimrangpara, Oct 22: Rimrangpara Higher Secondary School-ni taridapgipa nokko Bristibar salo, Meghalaya a•dokni Chief Minister Conrad K Sangma, Gambegre MLA Mehtab Chandee A Sangma aro Chokpot MLA Sengchim N Sangma-ni dongpaanio, nokdonggae on•angaha.
Ia skul nokko nokdonggae on•anganio a•dokni Chief Minister, jinmana aganprakangengon, ia sorkarina lekka porani kamrangan mongsongbatgipa daito ong•ani gimin bilsiantian gong crore 4000-ko koros ka•enga ine aganaha.
2018 bilsio, National People’s Party (NPP)-ni dilanichi sorkariko jako ra•e chalaina skang, lekka porao dingtang dingtang neng•nikanirang, jekai SSLC porikkao result-rang namgijani, skul nokrang namjae class-rangko man•gijani aro uandakgipa dingtang dingtang neng•nikanirangko chagrongna nangkuengachim ine janapatengon, batanggimin bilsichetni gisepo ia sorkari, rakbee kamrangko ka•anichi da•o obostarangko namkalbatatna man•aha ine Chief Minister aganaha.
Rimrangpara Higher Secondary School-ni gimin janapangengon, ru•uta bilsirangna ia skul nok namsrangjahani a•sel skulo poraienggipa chatro chatrirang aro skigiparang neng•nikanirangko chagrongna nangengachim indiba Chief Minister’s Special Development Fund (CMSDF)-ni ning•o gong lak 14 tangkarangko chamate ia skul nokko taridapna man•aha ine Sangma, an•tangni kusi ong•aniko parakangaha.
Ia skul nokko taridapna gita rakbee kamrangko ka•ahani gimin ua jolni MLA, School Managing Committee, skigiparang, mondolini dilgiparang aro songni nokni manderangkoba mittelpilangaha.
Mission Education-ni bidingo talate on•angengon, ia Mission-ni miksonganiara, Meghalaya a•doko donggipa sorkari skul ge•antian namgipa classroom-rang dongchina aro pilak nangchongmotgipa cholrangko man•china ong•a ine Chief Minister parakataha.
Da•o dipet a•doko dam 2000-na baten skulrangko taridapna man•aha ine janapatengon, re•anggipa September-ni 23 tariko, dam 80-na baten gital skul nokrangko salsanon nokdonggana man•aha ine Chief Minister parakataha.
Da•ororo SSLC porikkani result-rang nambatrorobaengahani gimin an•tangni kusi ong•aniko parakangengon, ia bilsio SSLC porikkako segipa chatro chatrirangoni 86.84 percent ka•na man•aha aro HSSLC-oba 83 percent-na baten chatro chatrirang pass ka•na man•aha ine Chief Minister aganaha.
A•song gimikni Performance Grading Index (PGI)-ni gimin janapatskaengon, Meghalaya a•dokni PGI score-ba 2024 bilsio 448-oni 2026 bilsio 525.71-ona tang•doangaha ine Chief Minister parakataha.
Meghalaya a•doko dam 9000 sorkari LP skulrang, dam 3000 UP skulrang aro dam 1700 secondary skulrang donggenchimoba, higher secondary skulrangde dam 500-san aro college-rangba dam 80-san ong•aiani gimin chatro chatrirang, biaprangko man•jae neng•nikanirangko chagrongna nangenga ine janapatskaengon, ia neng•nikaniko chel•atna gita sorkari, batanggimin bilsichetni gisepo dam 23 manderangni gital college-rangko, Baghmara aro Williamnagar-o gital college building-rangko, Mahendraganj-o gital college-ko, a•dokni skanggipa State University-ko, Shillong-o Engineering College aro dingtang dingtang institute-rangko kulidape on•aha ine Chief Minister aganaha.
Skigiparangni neng•nikanirangkoba chel•chakna kamrangko ka•enga ine janapatengon, adhoc aro SSA skulrango skigiparangna Structured Pay Framework (SPF)-ko ra•gate, gong crore 800-mangni gita tangka paisarangko skigiparangni dormahana chame on•aha ine Sangma aganaha.
Rimrangpara skulni kal•chakramo gallery-ko rike on•china Gambegre MLA Mehtab Chandee A Sangma, mol•molahani gimin ia kamko gadang gadang dake chu•sokatnaba Chief Minister, ku•rachakaniko on•angaha.
Ia tom•bimonganio Gambegre MLA Mehbat Chandee A Sangma-ba aganprakangengon, Gambegre by-election-na uni campaign ka•engmiting somoio ia skul nokni obosta namsrangjahani gimin ia skul nokko rike on•china songni manderang aro skul managing committee, uko mol•molaha aro ua, iani bidingo Chief Minister baksa agangrikon, ua ia skul nokko rikna CMSDF-ni ning•o tangka paisarangko on•e dakchakna ku•rachakaha ine parakataha.
Gambegre constituency-ni manderangna pilak nanga dakchakanirangko on•engani gimin Chief Minister-ko mittelpilangengon, ia skulko nambatatna gita skigiparangko nambate skie on•china aro ma•a paarangkoba bakrimchina Gambegre MLA mol•molangaha.
The post Rimrangpara HS School-ni taridapgipa nokko CM nokdonggae on•a appeared first on Hub News.