Ֆրանսիայի իշխանությունները գիշերային պարետային ժամ են սահմանել Փարիզի կենտրոնական հատվածներում և այլ քաղաքներում՝ հանգստյան օրերին երկրում տեղի ունեցած անկարգություններից և թալանից հետո, հայտնում է BBC-ն։
Փարիզի ոստիկանությունը հայտնել է, որ պարետային ժամն ուժի մեջ կլինի տեղական ժամանակով ժամը 23:00-ից (GMT 21:00) մինչև ժամը 6:00-ն Հանրապետության հրապարակում, որտեղ ցուցարարները հավաքվել էին հանգստյան օրերին, նաև Լե Ալ առևտրային շրջանում։
Քաղաքի կենտրոնի մի շարք այլ հատվածներում նաև արգելվել են չարտոնված հավաքները։ Երիտասարդների տեղաշարժը և հավաքները սահմանափակող մասնակի պարետային ժամ է հայտարարվել նաև այլ քաղաքներում, այդ թվում՝ հարավում՝ Մարսելում, Բորդոյում, Նիսում և Լիոնում, ինչպես նաև հյուսիսում գտնվող Լիլում և այլ քաղաքներում:
Ֆրանսիական իշխանություններն այս քայլերին են գնացել հանգստյան օրերին ողջ երկրում տեղի ունեցած ցույցերից հետո, որոնք ուղեկցվել էին անկարգություններով և ոստիկանության հետ բախումներով: Ցուցարարները շենքեր էին այրել, խանութներ թալանել, մոտ 2000 բիզնես է տուժել: Մոտ 150 ոստիկան և 500 ցուցարար է վիրավորվել, ավելի քան 1800-ը՝ ձերբակալվել:
Ավելի վաղ ներքին գործերի նախարար Լորան Նունյեսը, որը խիստ քննադատության է արժանացել ընդդիմադիր քաղաքական գործիչների կողմից անկարգություններին պատշաճ չնախապատրաստվելու համար, խոստովանել էր, որ ոստիկանությունը «կորցրել է վերահսկողությունը» որոշ քաղաքներում, ապա հրաժարական ներկայացրել: Սակայն նախագահ Էմանուել Մակրոնը մերժել էր այն՝ ասելով, որ դեռ շատ աշխատանք ունեն անելու երկրում կարգուկանոն հաստատելու համար:
Ֆրանսիայում բողոքի ակցիաները սկսվել են անցյալ ամիս. ուսանողները պահանջում էին բարելավել դպրոցների շենքային և այլ պայմանները, սակայն հետագայում ցույցերը վերածվեցին իշխանությունների դեմ ընդհանուր դժգոհության՝ ընդգրկելով ավելի լայն շրջանակի մտահոգություններ, իսկ այս շաբաթավերջին ցույցերին մասնակցողների թիվը մեծացել էր արհմիությունների և տարբեր խմբերի շնորհիվ։
Երեկ հրավիրած կառավարության արտահերթ նիստի ժամանակ վարչապետը հայտարարեց, որ քաղաքապետերին լիազորություն է տրվում իրականացնել պարետային ժամեր «այնտեղ, որտեղ անհրաժեշտ է», առանց մանրամասնելու, թե որ քաղաքներում դրանք կիրականացվեն։
Սեբաստիան Լեկորնուն, որը չէր բացառել երկրում արտակարգ դրություն մտցնելը, նաև ասել էր, որ կառավարությունը նաև գումար կհատկացնի տուժած տնտեսվարողներին՝ վնասը վերականգնելու համար: Ընդորում՝ դրա համար ծախսվող գումարը կբռնագանձվի նրանցից, ովքեր մասնակցել են բռնությանն ու թալանին: «Կընդունվի օրենք՝ ապահովելու համար, որ վճարեն նրանք, ովքեր գույք են վնասել», - ասել է Լեկորնուն։
Ներքին գործերի նախարար Լորան Նունյեսն իր հերթին ասել է, որ 200 քննիչներ ուսումնասիրում են տեսախցիկների տեսագրությունները՝ փորձելով նույնականացնել հնարավոր հանցագործներին: