Թուրքիայի նախագահի աշխատակազմը հերքել է Ադրբեջանում թուրքական դրոշն իջեցնելու փորձի մասին համացանցում տարածվող տեղեկությունները՝ դրանք ապատեղեկատվություն որակելով։
Թուրքիայի նախագահի աշխատակազմի՝ ապատեղեկատվության դեմ պայքարի կենտրոնը հայտարարել է, որ տարածվող տեսանյութը հին է, և դրանում պատկերված դեպքը նոր չէ։
«Այդ կադրերի նկարահանման ժամանակ հենց Ադրբեջանի քաղաքացիներն էին առաջինը և ամենավճռականը արձագանքել թուրքական դրոշի նկատմամբ վիրավորական գործողություններ կատարելու փորձին։ Թուրքիայի դրոշն իջեցնելու որևէ միջադեպ տեղի չի ունեցել», - ասվում է կենտրոնի հայտարարությունում։
Անկարայի պնդմամբ՝ հին կադրերը որպես նոր միջադեպ ներկայացնելը և համատեքստից դուրս տարածելը նպատակ ունի վնասել Թուրքիայի և Ադրբեջանի «բարեկամական ու եղբայրական» հարաբերություններին։
Հայտարարությունը հնչում է Անկարայի և Բաքվի հարաբերություններում վերջին շրջանում ծագած տարաձայնությունների ֆոնին։
Նախօրեին Ադրբեջանը Թուրքիայի յոթ քաղաքացու նկատմամբ ձերբակալման որոշումներ է կայացրել։ Նրանց մեղադրում են իշխանությունը բռնի ճանապարհով տապալելու կոչերի և կրոնական ատելություն հրահրելու մեջ։
Երկու երկրների միջև տարաձայնություններ էին առաջացել նաև ադրբեջանական դպրոցներում հիջաբի սահմանափակումների և թուրք որոշ քաղաքական գործիչների կողմից Ադրբեջանի ու Իսրայելի հարաբերությունների քննադատության շուրջ։