Xankəndi şəhərində “SOCGOV 2026: Ağıllı idarəetmə üçün rəqəmsal təhlil” mövzusunda beynəlxalq forum keçirilir.
APA-nın Qarabağ bürosu xəbər verir ki, Əmək və Əhalinin Sosial Müdafiəsi Nazirliyinin tabeliyindəki DOST Agentliyinin təşkilatçılığı ilə keçirilən forumda müxtəlif ölkələrdən hökumət rəsmiləri, yerli və beynəlxalq ekspertlər iştirak edirlər.
Forumda sosial xidmətlərdə süni intellekt və rəqəmsal analitikanın tətbiqi, dövlət-vətəndaş münasibətlərinin təkmilləşdirilməsi və ağıllı idarəetmə modelləri sahəsində qabaqcıl təcrübələrin mübadiləsi müzakirə olunur.
Tədbir çərçivəsində panel sessiyaları, tematik müzakirələr və xüsusi təqdimatlar keçirilir.
Forumda SOCGOV təşəbbüsünün sosial idarəetmə sahəsində beynəlxalq dialoq, təcrübə mübadiləsi və tərəfdaşlıq platforması kimi inkişaf etdirilməsini dəstəkləyən Bəyannamənin qəbul olunması nəzərdə tutulur.