Հռոմի պապ Լևոն XIV-ի մոտ թոքի քաղցկեղ է ախտորոշվել, նրա աջ թոքի ստորին հատվածը հեռացվել է հաջողությամբ, հայտնել է Վատիկանը։
71-ամյա պոնտիֆիկին երեկ Հռոմի Ջեմելի հիվանդանոցում վիրահատել են մոտ 90 րոպե, ինչից հետո նրա մոտ ախտորոշվել է թոքերի ադենոկարցինոմա։
«Վիրահատությունը հաջող է անցել, և բարդություններ չեն եղել: Վիրահատությունից հետո Հռոմի պապը նորմալ արթնացել է և կարճատև զննությունից հետո վերադարձել իր հիվանդասենյակ»,- հայտնել է Վատիկանը։
Հայտարարությունում նաև նշվում է, որ Պապի աջ թոքի ամբողջ ստորին հատվածն է հեռացվել՝ ապահովելու, որ գոյացությունն ամբողջությամբ է հեռացվել: Հռոմի պապը հիվանդանոցում կմնա մոտ մեկ շաբաթ։
Վատիկանից Agence France-Presse լրատվական գործակալությանը հայտնել են, որ լրացուցիչ թեստեր են անցկացվում՝ պարզելու համար, թե արդյոք կան քաղցկեղի տարածման նշաններ։
Լևոն XIV-ը գոյացության մասին հայտնել էր կիրակի: Այն առաջին անգամ հայտնաբերվել է բժշկական հերթական զննության ժամանակ: Նա ասել էր, որ հանգույցը կամ գոյացությունը հայտնաբերվել է «շատ վաղ փուլում», սակայն բժիշկները նրան խորհուրդ են տվել հեռացնել այն։
Մինչ այդ մեծ բազմություն էր հավաքվել հիվանդանոցի դիմաց։ Նրանք ծափահարություններով ողջունել և բարեմաղթանքներ էին հնչեցրել Պապին, երբ նա անցել էր բազմության մոտով հիվանդանոց մտնելիս: