ONGWEDIVA- Omukulunhu koshikondo shokulela oimbuluma tai ningwa komalungula, ta longele ehangano CRAN Conerlia Shipindo okwa kumaida oshiwana opo shi kale alushe tashi lopota pefimbo oimbuluma oyo tai ningwa komalungula.
Okwa yelifa ta ti eshi otashi kwafele opolifi i kale ya katuka onghatu nokukala ya ninga omakonakono omeendelelo.
Edi Shipindo okwe di popya onghela pefimbo kwa li ta yandje oshipopiwa shaye komutumba wopaungoba tau ningwa mOngwediva.
Omutumba ou owa tamekele Omaandaxa notau xulu Etitano.
Owa patululwa onghela kuMinista womauyelele, omakwatafano opaungoba Emma Theofelus.
Omahangano a yooloka mwa kwatelwa oshifo kundaneki sho New Era oku li taa kufa ombinga komutumba wopaungoba okutopolafana ouyelele nounongo woipambele ya nyika oungoba.
Oshi li oshikando shotete monooli ta mu ningwa omutumba woipambele youngoba.
Shipindo okwa kumaida oshiwana opo shi xulife po okuyandja eenomola dopaumwene dombaanga molwaashi otashi eta oimaliwa yavo i vakwe ko.
“Kotokele ni okatoo okupitila keengodi unene tuu ngeenge ta mu dengelwa eengodi ta mu lombwelwa kutya omwa findana oshimaliwa shonhumba. Ina mu yandja vali ouyelele weni weenomola dombaanga,” ta ti.
Okwa ti ovanhu paife ova ninga oihakanwa yokutulwa mokatoo ndele tava ka nifa oimaliwa yavo tashi pitile keengodi.
Shipindo okwa ti ovanhu ina va ya vali meenghundafana novanhu tava shakeneke ngeenge vaya keembanga molwaashi eshi otashi kwafele opo vaha ka nife oimaliwa yavo.
“Okwa ti ova didilika ovanhu vamwe ngeenge va tulwa mokatoo ohava vele ombaanga ombedi ile opolifi. Efimbo keshe oshiwana otashi pewa ehongo kombinga yokatoo okupitila komalungula,” ta ti.
Okwa yelifa ta ti ombelewa yaye oya pewa oshinakuwanifa shokuyandja ehongo nokukelela oumbudi tau ningwa okupitila komalungula.
Okwa kumaida oshiwana opo shi topolafane ouyelele mehongo kombinga yokatoo noumbudi tau ningwa komalungula.
-fhamalwa@nepc.com.na
The post Lopoteni oimbuluma tai ningwa komalungula pefimbo – Shipindo appeared first on New Era.