Guddiga Madaxa-bannaan ee Doorashooyinka iyo Soohdimaha Qaranka Soomaaliya ayaa si rasmi ah u shaaciyay jadwalka doorashooyinka…
15 October, 2026
Guddiga Madaxa-bannaan ee Doorashooyinka iyo Soohdimaha Qaranka Soomaaliya ayaa si rasmi ah u shaaciyay jadwalka doorashooyinka Baarlamaanka Federaalka iyo Madaxweynaha Soomaaliya ee sannadka 2027, xilli uu weli taagan yahay khilaafka siyaasadeed ee la xiriira dastuurka iyo hannaanka doorashooyinka dalka.
Guddoomiyaha guddiga, Cabdikariin Axmed Xasan, ayaa sheegay in guddigu bilaabayo hirgelinta doorashooyinka labada aqal ee Baarlamaanka Federaalka Soomaaliya, kuwaas oo loo qorsheeyay inay ku dhacaan nidaamka qof iyo cod, iyadoo doorashada labada aqal ee Baarlamaanka ayaa la qaban doonaa 15-ka Abriil 2027, halka doorashada Madaxweynaha Jamhuuriyadda Federaalka Soomaaliya loo asteeyay 15-ka May 2027.
Jadwalka guddiga ayaa sidoo kale dhigaya in dib loo furo diiwaangelinta ururrada siyaasadda iyo codbixiyeyaasha muddada u dhexeysa 1-da iyo 22-ka Nofeembar 2026. Ururrada iyo dhinacyada doorashada ka qaybgalaya ayaa sidoo kale lagu wargeliyay inay liisaska musharraxiinta labada aqal soo gudbiyaan ugu dambayn 22-ka Nofeembar 2026. Liiska ku-meelgaarka ah ee codbixiyeyaasha ayaa la qorsheeyay in la soo saaro 21-ka Janaayo 2027.
Sidoo kale, ololaha doorashada labada aqal ee Baarlamaanka ayaa la qorsheeyay inuu bilowdo 27-ka Febraayo 2027, halka liiska kama dambaysta ah ee codbixiyeyaasha la filayo in la soo saaro 15-ka Maarso 2027.
