TURA: South Garo Hills a·jaona dakanggipa National Highway (NH-217) rama namsrangjaengani gimin ia ramako ta·raken tarina gita South Garo Hills a·jani sakgittam MLA-rangko bakrime, a·dokni Chief Minister Conrad K Sangma-ko didichina, Garo Students Union (GSU) Central Executive Committee (CEC) didiataha.
Iani bidingo South Garo Hills a·jani MLA-rangna sedoatengon, NH-217 ramako ta·raken tarina gita Rongara-Siju MLA Rakkam A Sangma, Chokpot MLA Sengchim N Sangma aro Baghmara MLA Kartush R Marak sakgittamkon bakrime, a·dokni Chief Minister Conrad K Sangma baksa agangrikchina GSU-ni president Zikku Balgra N Marak didiataha.
Baghmara-oni Karonggre-ona dakbagipa rama namsrangjahani gimin janapatengon, ia rama namsrangjahani a·selan Baghmara Civil Hospital-ona sagiparangko salruraanio, class-rangchi aro porikka sena re·ruraenggipa chadamberang aro game ge·e cha·giparangba an·tangtangni game ge·e man·gipa bosturangko bazar antirangona sokatanio neng·nikanirangko chagrongna nangtokenga ine GSU president parakataha.
Ia rama gita gari gorarang re·ruraanio neng·nikanirangko chagrongna nangengani a·selan manderangni nangchongmotgipa bosturangni dam rakbatroroskaenga ineba GSU parakataha.
Ia rama namsrangjahani a·sel songni nokni manderang neng·nikanirangko chagrongna nangtokengani gimin Tojanang, Dompai aro gipin songni manderangba an·tangtangan ia ramako, ro·ong aro a·dubekrangchi tarina nangaha ineba GSU president parakataha.
GSU-ni parakatani gitade, ia ramani bidingo dingtang dingtang dolrang, changni chang sorkarina chittirangko sedoatengoba aro jingjengatanirangko dakengoba, ramana ra·gipa a·ani tangkarangko gamkujaengani a·sel, tender on·ani kamrang bon·chipengani a·sel aro ia project-ko National Highways and Infrastructure Development Corporation Limited (NHIDCL)-na pakwatna miksonganiko da·onan talkujaengani a·sel ia ramako tarina man·chipkujaenga.
Iani bidingo a·dokni Chief Minister-ko grongenba, nanga kamrangko ta·rakatna gita Union Road Transport & Highways Ministry baksa agangrikna didichina South Garo Hills a·jani sakgittam MLA-rangko GSU didiataha.
Ia ramako PWD-ni National Highway Division ba NHIDCL tarigenchimoba, Garo Hills-o mikkarang waani kri baikamna gita dake tarichinaba GSU dabiangaha.
Ia project-ni kamrangko a·bachengna man·kujaskal, Baghmara-Karonggre aro Baghmara-Dangsa A·we ramarangko ta·raken taripile on·skachina gitaba GSU, a·dok sorkariko didiataha.
South Garo Hills-ko gitchambatsranggipa indiba rama namjabatsranggipa a·jarangoni damsa ine janapatengon, ia NH-217 ramako tariani bidingo Chief Minister baksa agangrikchina GSU, South Garo Hills a·jani MLA sakgittamkon didiataha.