Da·al Baghmara-o jinma tom·bimonganiko ong·atenga
BAGHMARA: South Garo Hills a·jaona dakanggipa National Highway (NH-62), jekon da·o NH-217 ine mingskaaha, ia ramani obosta namsrangjaengahaoba ia ramako tarigija donchipengani gimin A·chik Holistic Awakening Movement (AHAM) suk ong·gijaniko parakatenba, ia ramako ta·raken tarichina didiataha.
Ia NH-217 ramako tarichipgija donengani a·sel jolo songdongenggipa manderang aro rama gita re·ruraenggipa manderang, neng·nikanirangko chagrongna nangtokengani gimin ia ramako ta·raken tarichina dabie, adita salrangna skangsan South Garo Hills a·jani dingtang dingtang dolrang, Non-Cooperation Movement (NCM)-ko changgnina ong·atahachim.
NCM-ko ong·ate sorkarini kosako jingjengataniko dakangani ja·manba ia ramako tariani bidingo maming aganchakanirangko on·jaengani gimin South Garo Hills a·jani dingtang dingtang dolrang, da·al Budbar salni bako, Baghmara-o jinma tom·bimonganiko ong·atskaenga.
Ia jinma tom·bimonganiko ong·atanio AHAM-ba chakpaaniko on·atengon, Darugre-oni Baghmara gita Dalu-ona km 136-mang ong·gipa ramako tarina re·anggipa June jani 15 tarikon Union Road Transports & Highways Minister Nitin Gadkari, gong kror 4000-ko chamataha indiba da·alonan ia ramako tarichipkujaenga ine parakataha.
Indake ong·engon, ia ramako tarina dongimin somoi aro pilak nanganirangko jinmana parakchina gita AHAM, MoRTH, National Highway-ni official-rang aro Meghalaya sorkarikoba didiataha.
Nosto ong·gipa ramani bakrangko ta·raken taridape on·china, a·a ra·ani kamrangko ta·rakatchina, tangka paisa chamaniko bariatchina aro songadam nokadamrango rama jal·langrangko namdapatchinaba AHAM dabiangaha.