ONDANGWA- Elelo lodoolopa yaNdangwa ota li ka kala nefiku loudano wokutondoka omo ovanhu 422 ve li shangifa nelalakano lokukufa ombinga mokutondoka.
Omupopiliko welelo lodoolopa yaNdangwa Petrina Shitalangaho- Mutikisha okwa holola kutya omalongekido okuninga efiku lomaudano okwa pwa.
Okwa shiiva ovakalimo vomOndangwa opo ve uye va tale omakoma eshi taa ningi omafiyafano okutondoka.
Okwa ti okwa li va tengeneka omwaalu wovanhu 300 ve li shangife ashike paife owa pitilila.
Okwa ti naashi otashi ulike kutya mboli oshiwana oshina ohokwe youdano wokutondoka.
“Omudo wa dja ko ovanhu ashike kwa li 260 va kufa ombinga moudano ou. Neudo omwaalu owa wedelwa.,” ta ti.
Okwa ti ovanhu tava ka kufa ombinga okukondjifafana okutondoka oinano ya yooloka.
Otaku ka lotokwa oinano ya yooloka ngaashi eekilometa 21, oshinano sheekilometa 15, oshinano sheekilometa 10 osho yo oshinano sheekilometa nano.
Okulishangifa otaku kosho eendado da yooloka she li kwatela koshinano osho omunhu a hala okukufa ombinga.
Oshinano sheekilometa 21 otashi li shangifwa koN$150, oshinano sheekilometa 10 otashi li shangifwa koN$100, oshinano sheekilometa 15 otashi li shangifwa N$120 omanga oshinano sheekilometa 5 otashi li shangifwa koN$50.
Ovanhu tava ka findana otava ka pewa eembadi da yooloka she li kwatelela koshinano osho omunhu a kufa ombinga.
Elalakano loudano wokutondoka okuhanganifa oshiwana nokuhafela pamwe tashi pitile moudano.
Oudano wokutondoka owa fimana shaashi otau xwaxwameka ovanhu va kale ve na oukolele nomalutu a djanguka nawa.
Omunhu keshe okwa manguluka okukala e li shangifa a kufe ombinga momaudano aa shaashi okulotoka okwa fimana noku li oshitopolwa shokuninga omadewo.
Ovanhu vamwe ova tameka nale okulanda oikutu yavo neenghaku dokutondokifa.
Vamwe ova hokolola tava ti itava nhu vali manga okakundu shaashi otave li longekidile okutondoka.
-fhamalwa@nepc.com.na
The post Oshiwana tashi keli kufa eengonyoto momaulu mongula kOndangwa appeared first on New Era.