TURA: A·chik A·songni a·kawe jolrango, chong·motan Pedaldoba aro Rongsai jolrango Rubber sekkioniko dalgape bimang ong·atgimin (Rubber Sheet-ko) bading-chiwale cha·enggipa manderangni matnanganiko man·soenba Pedaldoba joloni nangrimgimin dingtang dingtang NGO-rang jolo Rubber Sheet tochakramoniko tik ong·gija jrianiko mesokenggipa Digital Weighing Scale-ko nirokeaha.
Nangrimgimin NGO-rangni nie-nike ra·giminko parkatani gitade, Rubber Sheet tochakramo jakkalgipa Weighing Scale-rango .30; .40; .60 dake kakketgija jriani tol·e ongko-ko mesokaniko nikna man·aha, indake A·chikrangni ritcha-ni-ritcha Kg. Rubber Sheet-ko bading-chiwale cha·anio gipin jatrangni togie cha·enganiko rim·a man·aha. Indake ong·engon, A·chikrangko cha·boke tarigipa ge 10 mang Digital Weighing Scale-rangko Pedaldoba joloniko NGO-rang ra·sekaha.
Iandake, Garo Hills-o janggi tanganiko cholko dakna, nokdang-a·baku rikna gita Rubber bagan dake cha·enggipa A·chik ma·a-paa-rangko, Garo Hills-o bading-chiwale cha·enggipa gipin jatrang, kangal cha·a-siaona sokatna jotton ka·enga ine Pedaldoba-oni nangrimgimin NGO-rang suk ong·gijaniko parakaha.