TURA: Tura-ni Congress MP Saleng A Sangma-ni agangipa video-ko tol·e taridapenba, ‘Facebook’ social media-o watpripraahani gimin ‘Shirley Irene’-ni bimingo Facebook account-ko chalaienggipa manderangni kosako Tura District Youth Congress (DYC) FIR ka·doangaha.
Iani bidingo Tura DYC-ni president Rikrak M Sangma, West Garo Hills a·jani Superintendent of Police (SP)-na FIR ka·doangaha aro uni FIR-o janapatani gitade, ia video-o, Tura-ni MP Saleng A Sangma-ni agangipa kattarangko tol·e taridapenba, manderangko dilsretna gita social media-o watpripraataha.
Tura MP-ni agangipa kattarangko tol·e taridapenba, social media-o wataniara manderangko dilsretasan ong·aigija ian MP-na bimingko ong·gija dake man·ataniba ong·enga ineba Tura DYC matnangataha.
Tura MP-ni agangipa kattarangko tol·e taridape social media-o watgipa Facebook account-ara sakgipin mandeni profile picture ba noksakosa mesoka ine janapatskaengon, ian sakgipinni noksako niam gri jakkalasa ong·engani gimin ia account-ko jakkalenggipa mandeni bidingo tale sandirokna nangenga ine Tura DYC-ni president parakataha.
“Ia Facebook account-ko jakkalenggipa mandeni ong·gija dakaniko sakki baksa rim·na man·genchimode, ian sakgipinni bimingko nosto ka·na, an·tangni bimingko dongnuna, sakgipinni bimingo cha·bokna aro uandakgipa niamrangko pe·ani ong·engani gimin Bharatiya Nyaya Sanhita, 2023 aro Information Technology Act, 2000-ni dongimin niamrango pangchake rakgipa sastirangko man·na nanga,” ine Tura DYC-ni president, West Garo Hills a·jani SP-na FIR ka·doanggipao janapataha.