Manga ashike etango ina li eta eenhemo nomuwalangandjo una ashike omawi oudila neetuwa tadi li nyenge, Elise Namashisha-Nakapunda okwa tema nale omundilo waye molukanda la Hakahana moshilandopangelo a tameke okuteleka oikulya yongula, a ningila ava tava i koilonga va kale va pita po.
Namashisha- Nakapunda okwa ti mongeshefa e i okwa kala mo oule weedula da fika po17. Okwa ti okwa tameka mo2009 konima ashike yefimbo li xupi eshi a kanifa ina oo emufiila oshinakuwanifa shokufila oshisho oundenge vatano osho yo komona kaye kamwe.
“Tete onda tameka ashike handi teleke oikulya yoshiwambo ame handi weda po oinima ngaashi eenyandi, eembe, eendunga osho yo omakwa, nokonima eshi ongeshefa yange yaka kula onda tameka yo handi weda po oikulya yokongolo,” ta ti.
Namashisha-Nakapunda okwa ti momukukala mongeshefa yaye, i na mona naana oixuna lela unene ngeenge tashi ya povalandi shaashi okwa twikila ashike nedina laina oo ali ha landifa okapana momudingonoko waHahakana nokwa kala e shiivike nalwa kuvahapu.
“Ame onda kala noku li ufana omunangeshefa kamana shaashi onda da lelwa mongeshefa,” ta ti.
Konima yeedula dishona ondjodi yaye yokuyambula po ongeshefa osho yakulu.
Ta ti okwa papala eshi ha teleke oivilo yakula, yee ta telekele yo ovanhu veendodo da yooloka opo a mone po oshimaliwa shaye.
“Ovanhu vahapu eshi va ka shiiva kutya okombifa ya Namashisha moHakahana natango omo ili tai teleke oikulya lela, vahapu ova ka tameka okukala hava mbestele oikulya yavo kwaame, ame handi i twala keembelwa davo, vo vamwe tave ya kwaame,” ta ti.
Namashisha- Nakapunda okwa ti nonande ongeshefa yaye tai ende nawa ngaha, omashongo ka ena apa i haa kala eli.
Okwa ti oha taalele omashongo ngaashi onhele yokulongela ishona, oikwafifo yokuteleka oyo tai dulu okuninga oilonga yaye ipu, osho yo oshimaliwa shokutovifa ongeshefa yaye apa ili paife i dule okuya kokule.
Ashike nande ongaho, ota pandula Kalunga apa emutula fiyo opapa, ashike ondjodi yaye okuya komesho a finde apa eli paife. Okwa ti mopaife oha longifa omapandja okomalungula okuandjakanifa ouyelele wongeshefa yaye oko haku mu dile lela ovalandi vahapu.
“Onda hala okutwa ovangeshefa vakwetu moWindhoek omukumo opo va twikile ashike naapa tava dulu shaashi ngeenge otava kondjo nena aishe oina ashike okuenda nawa,” ta ti -taimihaihambo@gmil.com
The post Okombifa yaNamashisha ohai teleke eendja appeared first on New Era.